PDF
Amerikan Milli hokkeý ligasy NHL-de çempion, ýagny Stenli Kubogynyň eýesi final duşuşyklarynyň altynjysynda belli boldy. Geçen möwsümiň gaýtalanan finalynda “Florida Panters” çempionlygyny goramagy başardy.
6-njy duşuşyk Floridadaky “Amerant Bank Arena”-da geçirilip, ýer eýeleri “Florida Panters” topary “Edmonton Oilersi” 5-1 hasabynda ýeňlişe sezewar etdi. Duşuşykda garşydaşlarynyň her ýalňyşynda tapawutlanan Säm Reinhart 4 şaýbany öz adyna ýazdyrdy. Ol duşuşygyň 4-nji, 37-nji, 53-nji we 54-nji minutlarda tapawutlanmagy başardy. “Florida Pantersiň” beýleki goluny 19-njy minutda Matýuw Tkaçak derwezä girizdi. Kanadalylaryň ýeke-täk şaýbasyny 55-nji minutda Wasiliý Podkolzin geçirdi. Şeýlelikde, umumy hasapda 4:2 öňe saýlanan “Florida Panters” topary bassyr 2-nji çempionlygyny baýram etdi.
Iki toparyň arasyndaky 1-nji oýunda “Edmonton Oilers” öz meýdançasynda owertaýmda 4:3, 2-nji oýun hem Kanadada geçirilip, “Florida Panters” 2 owertaýmyň netijesinde 5:4 ýeňiş gazandy. 3-4-nji duşuşyklar Floridada geçirildi we ýer eýeleri olaryň ilkinjisinden 6:1 hasabynda garşydaşyndan üstün dykdy. 4-nji duşuşyk owertaýmyň netijesinde ýeňiş Edmonton Oilersiň peýdasyna tamamlandy (5:4). Kanadanyň Alberta şäherinde oýnalan 5-nji duşuşykda 5:2 üstün çykan “Florida Panters” bassyr 2-nji ýeňşine golaýlady. 6-njy oýny-da öz meýdançasynda geçiren floridalylar garşydaşynyň hasaby deňlemegine ygtyýar bermedi we çempionlygyny goramagyň hötdesinden geldi.
“Florida Panters” topary 1996-njy we 2023-nji ýyllarda finalda ýeňlipdi.
Bassyr 2-nji gezek finalda utulan “Edmonton Oilers” toparyna 1990-njy ýyldan bäri Stenli Kubogyny gazanmak başardanok. 1984-nji, 1985-nji, 1987-nji, 1988-nji we 1990-njy ýyllarda, jemi 5 gezek çempionlyk gazanan “Edmonton Oilers” 4-nji sapar finalda asgyn geldi (1983, 2006, 2024, 2025). Toparyň derwezeçisi Kori Perri soňky 6 ýylda 5-nji gezek finalda ýeňlişe sezewar boldy. Ol 2020-nji ýylda “Dallas Stars”, 2021-nji ýylda “Monreal Kanadiens”, 2022-nji ýylda “Tampa Baý Laýtning”, soňky 2 ýylda-da “Edmonton Oilers” kluby bilen finalda utuldy.
1916-njy ýyldan bäri geçirilip gelinýän NHL-de ilkinji ýeňiji “Monreal Kanadiens” 24, “Toronto Mäpl Lifs” 13, “Detroit Red Wings” 11, “Boston Bruins” 6, “Çikago Bläkhawks” 6, “Edmonton Oilers” 5 gezek çempionlyk gazandy.
