14-15-nji awgustda Daşkent şäherinde “Merkezi Aziýa – ynanyşmagyň, howpsuzlygyň we durnukly ösüşiň umumy giňişligi” atly Merkezi Aziýanyň bilermenleriniň sekizinji forumy geçirilýär. Bu forumyň işine Merkezi Aziýa ýurtlarynyň strategik institutlaryň, ylmy barlag merkezleriniň ýolbaşçylary, hünärmenleri we alymlary, şol sanda Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň wekilleri gatnaşýar.
Çäräniň açylyş dabarasyna Özbegistan Respublikasynyň Prezidentiniň ýanyndaky Strategik we sebitara barlaglar institutynyň, Halkara Merkezi Aziýa institutynyň, Daşary işler ministrliginiň ýolbaşçylary we wekilleri, Merkezi Aziýa ýurtlarynyň we Ýewropa Bileleşiginiň Özbegistan Respublikasyndaky ilçileri we BMG-niň Merkezi Aziýa üçin Öňüni alyş diplomatiýasynyň sebit merkeziniň ýolbaşçysy gatnaşdy.
Çäräniň maksatnamasy sebitleýin hyzmatdaşlygy çuňlaşdyrmagyň geljegine garamagy we köptaraplaýyn özara gatnaşyklary ösdürmek üçin anyk çäreleri kesgitlemegi öz içine alýar.
Strategik we sebitara barlaglar institutynyň direktory Eldor Aripow forumy açmak bilen Merkezi Aziýanyň bilermenler forumynyň sebitleýin hyzmatdaşlygy güýçlendirmek üçin “täze pikirler döretmek laboratoriýasyna” öwrülýändigini belledi.
“Täze Merkezi Aziýa: sebit hyzmatdaşlygynyň arhitekturasyny kämilleşdirmek” atly forumyň birinji bölümçesiniň çäginde Türkmenistan Daşary işler ministrliginiň Halkara gatnaşyklar institutynyň bilermeni Bekdurdy Amansaryýew çykyş etdi. Ol häzirki wagtda Merkezi Aziýanyň diňe bir geografiki sebit däl, eýsem syýasy dialog, ykdysady integrasiýa we ynsanperwer ýakynlaşmak üçin döreýän giňişlikdigini belledi.
Türkmen bilermeni Türkmenistanyň sebitiň ösüşine möhüm goşant goşýan ugurlary, ýagny parahatçylyk we howpsuzlyk, ulag-logistika arabaglanyşygy, energetika, suw meselesi, ekologiýa we ynsanperwer hyzmatdaşlyk barada giňişleýin gürrüň berdi.
B.Amansaryýew çykyşynyň ahyrynda Türkmenistanyň hemişelik Bitaraplygynyň daşda durmagy aňlatman, eýsem parahatçylyk döredijilikli başlangyçlar üçin platforma bolup hyzmat edýändigini belledi. Ýurdumyz Merkezi Aziýanyň doganlyk döwletleri bilen gatnaşyklary has-da berkitmäge, gepleşikleri ösdürmäge hem-de adalatly we durnukly sebit integrasiýasynyň täze modeliniň emele gelmegine goşant goşmaga taýýardygyny tassyklaýar.

Gyzykly bolup bilerЕЩЕ ОТ АВТОРА