“Time Out” neşiri dürli ýurtlardaky 31 sany köçäniň reýtingini çap etdi. Bu sanaw ýerli redaktorlar we hünärmenler tarapyndan naharhanalaryň hili, dynç alyş mümkinçilikleri we köçäniň umumy gurşawy ýaly ölçegler esasynda düzüldi. Degişli sanaw žurnalyň resmi saýtynda ýerleşdirildi.
Düzüjileriň bellemegine görä, bu sanawa öz şäherleriniň ruhuny we häsiýetini iň gowy şöhlelendirýän köçeler girdi. Ilki bilen, dürli ýurtlaryň redaksiýalary öz tekliplerini hödürlediler, soňra bolsa “Time Out” neşiriniň syýahatçylyk boýunça halkara topary her bir ýeri elýeterli hyzmatlary, medeni çäreleri, iýmit-dynç alyş nokatlary we ýerli jemgyýetiň işjeňlik derejesi boýunça baha berip, sanawy takyklaşdyrdy.
Reýtingiň iň ýokary basgançagynda Rio-de-Žaneýronyň (Braziliýa) merkezindäki Senado köçesi ýerleşdi. “Time Out” bu köçäniň ozallar antikwar dükanlary bilen meşhur bolandygyny, häzirki wagtda bolsa öňküsinden has çalt ösýändigini belleýär. Syýahatçylara bu ýere şenbe günleri gelmek maslahat berilýär – sebäbi şol gün bu köçede “Armazém Senado” atly meşhur samba sazlary ýaňlanýar.
Ikinji orunda Osakanyň (Ýaponiýa) Mämişi köçesi durýar. Bu ýer hem aslynda antikwar söwdasynyň merkezi bolan bolsa, 2010-njy ýyllardan başlap dünýä belli köçe modasy (streetwear) brendleriniň mekanyna öwrüldi. Wagtyň geçmegi bilen olara ýapon brendleri hem goşuldy. Häzirki wagtda bu ýerde köne dükanlar bilen bir hatarda, köçe naharhanalary we retro äheňli kofehanalar (kissatenler) işleýär.
Üçünji orny Portu şäherindäki (Portugaliýa) Bonžardim köçesi eýeledi. Ol meşhur syýahatçylyk ugurlarynyň golaýynda ýerleşýär we ýerli ýaşaýjylar üçin özüne çekiji nokat bolmagynda galýar.
Şeýle hem iň gowy onlugyň hataryna şu köçeler girdi: Fan Gua (Çendu, Hytaý), Şerbruk-strit-West (Monreal, Kanada), Montegýu Roud (Brisben, Awstraliýa), Maýbahufer (Berlin, Germaniýa), Olimpiu (Saloniki, Gresiýa), Orçard-strit (Nýu-Ýork, ABŞ) we Win-Han (Hoşimin, Wýetnam).

Gyzykly bolup bilerЕЩЕ ОТ АВТОРА