PDF
Zenanlaryň arasynda Şweýsariýada geçirilýän futbol boýunça zenanlaryň arasyndaky Ýewropa çempionatynda finala çykan toparlar belli boldy. Finalda soňky çempion Angliýa bilen Ispaniýanyň milli ýygyndylary duşuşarlar.
Çärýek finalda Italiýanyň ýygyndysy Norwegiýanyň milli toparyndan Kristiana Girelliniň 50-nji we 90-njy minutda geçiren gollary esasynda 2-1 hasabynda ýeňiş gazandy. Şwesiýa bilen Angliýanyň ýygyndylarynyň arasyndaky oýunda skandinawlar 1-nji ýarymda Asllaniniň (2) hem-de Bläksteniusyň (25) gollary esasynda 2-0 öňe saýlandy. Ýöne ruhdan düşmedik angliýaly zenanlar oýnuň soňky çärýeginde 2 minutda 2 gol geçirip, hasaby deňledi. Bu gollary 79-njy minutda Bronz bilen 81-nji minutda Agýemang öz atlaryna ýazdyrdylar. Goşmaça wagtda-da hasap üýtgemänsoň, ýeňijini 11 metrlik urgulary kesgitledi. Her topardan 7 oýunçy 11 metrlik jerime urgusyny ýerine ýetirip, iňlisler 3-2 hasabynda üstün çykdy.
Ispaniýanyň ýygyndysyna ýer eýeleri Şweýsariýnyň milli toparyny ýeňmek kyn düşmedi. Del Kastilýo (66) hem-de Pinanyň (71) gollary bilen 2-0 hasabynda ýeňiş gazanan ispanlar ýarym finala atlaryny ýazdyrdylar.
Fransiýa bilen Germaniýanyň ýygyndylarynyň arasyndaky oýnuň esasy we goşmaça wagtynda ýeňiş gazanan bolmady (1-1, Geýoro 15 p – Nüsken 25). 11 metrlik jerime urgularynda 6-5 öňe saýlanan nemesler ýarym finalda oýnamaga hukuk gazandylar.
Ýarym final duşuşyklary has ýatda galyjy we çekeleşikli geçdi. Italiýanyň ýygyndysy bilen duşuşan Angliýanyň milli topary ýene-de kembek etmegi başardy. Italýanlar Bonanseanyň 33-nji minutdaky goly bilen öňe geçdi. Ýöne olar soňky sekuntlarda üstünligini elden giderdi. 90+6-njy minutda Agýemang hasaby deňläp, çempiony ýaryşda saklamagy başardy. 19 ýaşyndaky hüjümçi çärýek finalda-da deňlik goluny geçiripdi. Goşmaça wagtyň hem soňky minutlarynda, has takygy, 119-njy minutda Hloe Kelli 11 metrlik jerime urgusyny ýerine ýetirdi. Ol derwezeçiniň saklan urgusyny täzeden urup, toparyna ýeňiş getirdi.
Beýleki ýarym finalda bolsa yklymyň 8 gezek çempiony, soňky finalçy Germaniýa bilen Dünýä Kubogynyň häzirki eýesi Ispaniýanyň ýygyndylary duşuşdy. Duşuşyk çekeleşikli geçse-de, esasy wagtda hasap açylmady. Goşmaça wagtda, has takygy, 113-nji minutda ispanlardan soňky 2 ýylda şahsy baýraklaryň ählisini diýen ýaly gazanan Aitana Bonmati tapawutlanyp, toparyny finala çykardy.
Final ýekşenbe gününde oýnalar
Angliýa bilen Ispaniýanyň ýygyndylarynyň arasyndaky final duşuşygy 27-nji iýulda, ýekşenbe güni Bazeldäki St. Ýakob-Park stadionynda oýnalar. Duşuşyk Aşgabat wagty bilen 21:00-da başlanar. Angliýanyň ýygyndysy 3-nji gezek finala çykyp, olar soňkusynda çempionlyk gazanypdy. Ispaniýanyň ýygyndysy bolsa ilkinji gezek yklym ýaryşynda finalda oýnar. Ýeri gelende bellesek, geçen ýylky EURO 2024-de, ýagny erkekleriň arasyndaky yklym ýaryşynyň finalyndan soň bu gezek zenanlaryň arasyndaky ýaryşyň finalynda Angliýa bilen Ispaniýanyň ýygyndylary duşuşar. Geçen ýylky finalda Ispaniýa ýeňiş gazanypdy. Zenanlaryň arasyndaky finalda-da bilermenlere görä, ispanlar altyn medala golaý diýlip bellense-de, kembekler bilen finala çykmagy başaran iňlisler çempionlygyny goramak üçin meýdança çykarlar. Ispanlaryň şu wagta çenli UEFA-yň ýaryşlarynda diňe şu çempionatda çempionlygy bolman, olar galan ýaryşlarda azyndan 1 gezek kubogy eýelediler.
Çärýek finalyň duşuşyklary:
Norwegiýa – Italiýa: 1-2, Şwesiýa – Angliýa: 2-2 2-3 (p), Ispaniýa – Şweýsariýa: 2-0, Fransiýa – Germaniýa: 1-1, 5-6 (p)
Ýarym finalyň duşuşyklary:
Angliýa – Italiýa: 2-1, Germaniýa – Ispaniýa: 0-1 (g.w.)
