11-nji martda Grenlandiýada parlament saýlawlary geçirildi. Grenlandiýanyň Merkezi saýlaw komissiýasynyň maglumatyna görä, 40,3 müň sesiň 28,6 müň sesi sanandan soň, “Demokratlar” partiýasynyň 29,9% ses alyp, öňde barýandygy belli boldy. “Demokratlar” adanyň garaşsyz bolmalydygy barada edýän tagallalary bilen tanalýar.
Grenlandiýanyň häzirki Premýer-ministriniň ýolbaşçylyk edýän partiýasy “Inuit Atakatigit” 21,4% ses alýar. Adada 2021-nji ýylda geçirilen soňky parlament saýlawlarynda partiýa parlamentdäki 31 ornuň 12-sine eýe bolup, soňra “Siumit” partiýasy bilen hökümet koalisiýasyny döretdi. “Simuit” partiýasy 14,7% ses alýar, “Nalerak” partiýasy 24,5%, “Atassut” partiýasy 7,3% ses alýar.
Grenlandiýanyň garaşsyzlygy baradaky mesele ABŞ-nyň Prezidenti Donald Trampyň adany ABŞ-a birikdirmek islegi baradaky çykyşlaryndan soň gozgaldy. Grenlandiýada hiç bir syýasy partiýa ýa-da ilatyň aglaba köplügi ABŞ-a goşulmagy goldamaýar. Munuň tersine, ähli syýasatçylar Daniýadan hem ABŞ-dan hem hakyky garaşsyzlygy goldaýarlar.
Grenlandiýa 1953-nji ýyla çenli Daniýanyň koloniýasydy. Häzirki wagtda bu ýurt Daniýa Patyşalygynyň bir bölegi bolmagynda galýar, ýöne 2009-njy ýylda özüni dolandyrmak we içerki syýasatda garaşsyz karar kabul etmek mümkinçiligi bilen özbaşdaklyga eýe boldy.
Geografik taýdan Demirgazyk Amerikada ýerleşýän adanyň 57 müň töweregi ilaty bar.

Gyzykly bolup bilerЕЩЕ ОТ АВТОРА