UEFA Çempionlar Ligasynda 2-nji saýlama tapgyryň jogap duşuşyklarynda Gazagystanyň “Kairat” topary ynamly ýeňiş gazandy. Finlýandiýanyň “KuPS” toparyndan myhmançylykda 2-0 hasabynda asgyn gelen “Kairat” öz meýdançasynda garşydaşynyň derwezesinden jogapsyz 3 gol geçirmegi başardy. Almatylar gollarynyň 3-sini hem 1-nji ýarymda geçirip, olardan Satpaýew (9), Žoržinio (29) hem-de Gromyko (43) tapawutlandy. Üstesine-de “Kairat” topary 2-nji ýarymy tutuşlygyna 1 oýunçy kem oýnasa-da (Zariýa 45-nji minutda gyzyl kart aldy), hasaby saklamagy başardy we ýaryşy dowam etdirmäge hukuk gazandy. 1-nji saýlama tapgyrda gazak kluby Sloweniýanyň “Olimpiýa Lýublýana” toparyny ýaryşdan çykarypdy. “Kairat” toparynyň 3-nji saýlama tapgyrdaky garşydaşy Slowakiýanyň çempiony “Slowan Bratislawa” bolar. “Slowan” topary 2-nji saýlama tapgyrda Bosniýa we Gersegowinanyň “Zrýinski Mostar” kluby bilen duşuşyp, öz meýdançasynda 4-0 hasabynda ýeňipdi. Jogap duşuşygy 2-2 hasabynda deňlikde tamamlandy.

Kiýewiň “Dinamosy” Maltanyň çempiony “Hamrun Spartans” toparyny öz meýdançasynda 3-0 hasabynda ýeňlişe sezewar etdi. Gollary Wanat (28), Bražko (35) hem-de Myhawko (82) derwezä girizdi. Serbiýanyň çempiony “Srwena Zwezda” Belgradda Gibraltaryň çempiony “Linkoln Red Imps” toparyndan 5-1 hasabynda üstün çykdy. 1-nji oýunda-da “Srwena Zwezda” 1-0 ýeňiş gazanypdy.