«Balkan» gämi gurluşyk we abatlaýyş zawodynyň Baş direktorynyň orunbasary Niderlandlar Patyşalygyna amala aşyran iş saparynyň çäginde deňziň düýbüni çuňaldyş işlerinde we deňziň düýbüni çuňaldyjy gämini gurmakda dünýäniň öňdebaryjysy hasaplanýan Royal IHC kompaniýasynyň ýolbaşçylary bilen birnäçe duşuşyk geçirdi.
Duşuşyk Sledreht şäherindäki Royal IHC kompaniýasynyň ştab-kwartirasynda geçirildi. Duşuşygyň çäginde «Balkan» gämi gurluşyk we abatlaýyş zawodynyň Baş direktorynyň orunbasary kompaniýanyň ýolbaşçylaryna Balkan zawodyň kuwwatlylygy, tehniki mümkinçilikleri, gämi abatlamakda tejribesi we ilkinji gury ýük gämileriniň gurluşygynyň täze taslamasy bilen tanyşdyrdy.
Duşuşygyň çäginde Balkan zawodyň teklibine aýratyn üns berlip, esasan hem, lokalizasiýa we Türkmenistanyň çäginde deňziň düýbüni çuňaldyjy gämini bilelikde gurmak we Royal IHC kompaniýasy bilen ikitaraplaýyn hyzmatdaşlygy ösdürmek barada pikir alyşdylar.
Duşuşykda türkmen tarapy Balkan zawodynda deňziň düýbüni çuňaldyjy gäminiň gurluşygy üçin Royal IHC kompaniýasynyň taslama resminamalaryny ulanmaga gyzyklanma bildirdi. Royal IHC kompaniýasynyň ýolbaşçylary hem bu başlangyjy goldadylar we bilelikde işlemäge taýýardyklaryny aýtdylar. Taraplar taslamany durmuşa geçirmek üçin tehniki we baha tekliplerini taýýarlamak barada ylalaşdylar.
Häzirki wagtda Türkmenistanda bu kompaniýanyň deňziň düýbüni çuňaldyjy 90-dan gowrak gämisi ulanylýar. Royal IHC kompaniýasy bilen hyzmatdaşlyk diňe bir deňziň düýbüni çuňaldyjy gämisiniň parkyny täzelemäge däl, eýsem ýurduň gämi gurluşyk pudagynda täze ösüş derejesine ýetmäge mümkinçilik berer.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА