28-nji ýanwarda BMG-niň Ženewadaky edarasynda edaranyň ýolbaşçysy Tatýana Walowaýanyň Ženewa şäherindäki diplomatik gullugynyň we halkara guramalarynyň wekilhanalarynyň ýolbaşçylary bilen duşuşygy geçirildi. Bu çärä Türkmenistanyň BMG-niň Ženewadaky edarasynyň ýanyndaky Hemişelik wekili Wepa Hajiýew hem gatnaşdy.
T.Walowaýa öz çykyşynyň dowamynda hyzmatdaşlygyň geljeginiň mümkinçiliklerini gysgaça beýan etdi. Parahatçylygy we dialogy saklamagyň möhümdigini bellemek bilen, T.Walowaýa, döwletleriň arasyndaky ynanyşmagy berkitmekde köpçülikleýin tagallalaryň ähmiýeti barada aýtdy we bu maksatlara ýetmekde köptaraplaýyn diplomatiýanyň ornyna ünsi çekdi.
Soňra çykyş eden BMG-niň ýanyndaky Parahatçylyk uniwersitetiniň (UPEACE) Hemişelik synçysy Dewid Fernandes Puýana parahatçylygy we ynanyşmagy goramagyň zerurdygy barada belledi. Şu nukdaýnazardan, ol bu gymmatlyklary saklamakda Türkmenistanyň aýratyn goşandyny nygtady. Türkmenistanyň başlangyjy bilen BMG-niň Baş Assambleýasy tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilmegi hem munuň aýdyň subutnamasydyr.
Türkmenistanyň BMG-niň Ženewadaky edarasynyň ýanyndaky Hemişelik wekili W.Hajiýew öz çykyşynda parahatçylyk we ynanyşmak mowzugynyň ähmiýetine ünsi çekdi. Ol duşuşyga gatnaşanlara Türkmenistanyň bu ugurda alyp barýan işleri barada giňişleýin maglumat berdi we 2025-nji ýylda ýurdumyzyň dialogy ösdürmegiň, halkara hyzmatdaşlygyny pugtalandyrmagyň we durnukly parahatçylygy üpjün etmegiň binýady bolan hemişelik Bitaraplygymyzyň 30 ýyllygynyň belleýändiginiň aýratyn mana eýedigini nygtady.
Duşuşyga gatnaşyjylar dünýä derejesinde parahatçylygy, ynanyşmagy we durnuklylygy saklamak boýunça umumy tagallalara ygrarlydyklaryny tassykladylar.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА