PDF
11-nji dekabrda hormatly Prezidentimiz Serdar Berdimuhamedow Halkara Bitaraplyk güni hem-de Türkmenistanyň hemişelik Bitaraplygynyň 30 ýyllygy mynasybetli dabaralara gatnaşmak üçin ýurdumyza sapar bilen gelen San-Tome we Prinsipi Demokratik Respublikasynyň Prezidenti Karluş Manuel Wila-Nowa bilen duşuşdy.
Döwlet Baştutanymyz Prezident Karluş Manuel Wila-Nowany mähirli mübärekläp, Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli geçirilýän Halkara foruma gatnaşmak baradaky çakylygy kabul edip, ýurdumyza sapar bilen gelendigi üçin minnetdarlyk bildirdi.
San-Tome we Prinsipi Demokratik Respublikasynyň Prezidenti Halkara foruma gatnaşmaga çakylyk hem-de bildirilen myhmansöýerlik üçin hoşallygyny beýan edip, sebitde we dünýäde parahatçylygyň pugtalandyrylmagy ugrunda çykyş edýän Bitarap Türkmenistanda saparda bolmagyň özi üçin uly hormatdygyny aýtdy, şeýle hem pursatdan peýdalanyp, hormatly Prezidentimizi Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli tüýs ýürekden gutlady.
Hormatly Prezidentimiz dostlukly ýurduň döwlet Baştutanynyň bu ýokary wekilçilikli foruma gatnaşmagynyň onuň Türkmenistanyň Bitaraplyk syýasatyny goldaýandygynyň we parahatçylyk ýörelgelerine berýän möhüm ähmiýetiniň görkezijisi bolup durýandygyny aýdyp, Halkara forumyň ählumumy parahatçylygy we ynanyşmak medeniýetini pugtalandyrmakda, häzirki zamanyň meseleleriniň çözgütlerini bilelikde işläp taýýarlamakda möhüm ähmiýete eýe boljakdygyny belledi.
Şeýle hem döwlet Baştutanymyz Prezident Karluş Manuel Wila-Nowanyň ýurdumyza saparynyň netijeleriniň Türkmenistan bilen San-Tome we Prinsipi Demokratik Respublikasynyň arasyndaky ikitaraplaýyn gatnaşyklaryň giňeldilmegine täze itergi berjekdigine ynam bildirdi.
Bellenilişi ýaly, Türkmenistan Birleşen Milletler Guramasy tarapyndan üç gezek ykrar edilen Bitaraplyk hukuk ýagdaýynyň esasynda daşary ýurt döwletleri bilen dostlukly gatnaşyklary alyp barýar. Bu ugurda ýurdumyz Afrika döwletleri bilen gatnaşyklaryň geljeginiň uludygyny göz öňünde tutup, sebitiň ýurtlary bilen hyzmatdaşlygy ösdürmäge aýratyn üns berýär.
Şunuň bilen baglylykda, hormatly Prezidentimiz Türkmenistan bilen San-Tome we Prinsipi Demokratik Respublikasynyň arasynda syýasy-diplomatik, söwda-ykdysady, medeni-ynsanperwer, şeýle hem beýleki ugurlarda hyzmatdaşlygy ösdürmegiň uly mümkinçilikleriniň bardygyna ünsi çekdi.
Döwlet Baştutanymyz şu ýylyň awgust aýynda «Awaza» milli syýahatçylyk zolagynda geçirilen Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatyna Prezident Karluş Manuel Wila-Nowanyň gatnaşandygyny belläp, bu saparyň iki ýurduň arasyndaky gatnaşyklaryň taryhynda möhüm ähmiýetli waka bolandygyny aýtdy.
Hormatly Prezidentimiz ýurdumyzyň hemişelik Bitaraplygynyň şanly baýramynyň giňden bellenilýän günlerinde dostlukly ýurduň döwlet Baştutanyny paýtagtymyz Aşgabat şäherinde kabul edýändigine kanagatlanma bildirip, şu gezekki saparyň üstünliklere beslenip, Türkmenistan bilen San-Tome we Prinsipi Demokratik Respublikasynyň arasyndaky gatnaşyklary mundan beýläk-de berkitmäge goşant goşjakdygyna ynam bildirdi.
Netijeli häsiýetde geçen duşuşygyň ahyrynda hormatly Prezidentimiz Serdar Berdimuhamedow we San-Tome we Prinsipi Demokratik Respublikasynyň Prezidenti Karluş Manuel Wila-Nowa iki ýurduň hem köptaraplaýyn hyzmatdaşlygy giňeltmäge ygrarlydyklaryny tassyklap, birek-birege alyp barýan jogapkärli döwlet işlerinde mundan beýläk-de üstünlikleri arzuw etdiler.
