5 – 14-nji iýul aralygynda Birleşen Arap Emirlikleriniň Dubaý şäherinde 57-nji Halkara himiýa olimpiadasy geçirildi. Halkara ders bäsleşigine dünýäniň 96 döwletinden 360-dan gowrak, şol sanda ýurdumyzdan 4 sany mekdep okuwçysy gatnaşdy.
Bäsleşikde zehinli mekdep okuwçylary nazary bilimler we amaly tejribeler boýunça özara bäsleşdiler. Himiýa dersi boýunça halkara olimpiadanyň jemlerine laýyklykda ýurdumyza wekilçilik eden mekdep okuwçylary 2 kümüş we 1 bürünç medal gazandylar. Has takygy, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçylary Diýar Döwletow we Rüstem Jumaýew kümüş, şol mekdebiň 10-njy synp okuwçysy Pälwan Ilmämmedow bürünç medallara mynasyp boldular.
Halkara himiýa olimpiadasy 1968-nji ýyldan bäri yzygiderli guralýar. Ol himiýa ugrundan mekdep okuwçylarynyň arasynda abraýly bäsleşikleriň biridir. Ders bäsleşiginiň düzgünlerine laýyklykda, oňa her ýurtdan 4 okuwçynyň gatnaşmagyna rugsat berilýär. Halkara olimpiadanyň geçirilýän ýeri her ýyl üýtgeýär. Geljek ýyl ders bäsleşigi Özbegistanyň paýtagty Daşkentde geçiriler.

Gyzykly bolup bilerЕЩЕ ОТ АВТОРА