Halkara kosmos bekedinde işleýän Mark Wande Haý kosmosda iň köp üznüksiz wagt geçiren amerikan astronawty bolar. NASA-nyň işgäri geçen ýylyň 9-njy aprelinde kosmosa çykypdy. Sentýabr aýynda onuň kosmosda bolmaly wagty yza süýşürilipdi. Şol sebäpli ol 30-njy martda Ýere dolanar. Bellenen wagtda Ýere gaýdyp gelse, Haýyň kosmosda geçiren wagty 355 güne ýeter. NASA-nyň häzirki rekordy 2016-njy ýylyň 1-nji martyna çenli 340 günläp Halkara kosmos bekedinde bolan Skott Kellä degişli.
2009-njy ýyldan bäri NASA-da zähmet çekýän Wande Haý geçen ýylyň oktýabrynda Ýere gelmelidi. Emma Russiýanyň “Çagyryş” filmini surata düşürmek üçin režissýor Klim Şipenkony we aktrisa Ýuliýa Peresildi kosmos bekedine ibermegi bilen Kelliniň ol ýerde galmaly wagty uzaldyldy. Bu iki kino işgäri Wande Haý bilen russiýaly kosmonawt Pýotr Dubrowyň hem orunlaryna aldylar.
Amerikan astronawty dolanyp gelende, NASA-nyň kosmosda üznüksiz bolan işgäri bolar. Emma bu ugurdaky dünýä rekordy 1994-nji hem-de 1995-nji ýyllarda Russiýanyň “Mir” kosmos stansiýasynda 437 gün bolan Waleriý Polýakowa degişli bolmadgynda galýar.
Birden köp kosmos missiýasynda iň köp wagt geçiren amerikaly Peggi Witsondyr. Ol jemi 665 gün kosmosda bolupdyr. Şeýle-de bolsa, bu ugurdaky rekord hem ruslara degişli. “Mir” hem-de Halkara kosmos beketlerinde iş alyp baran russiýaly Gennadiý Padalka jemi 879 gün kosmosda bolup, häzirki wagtda rekordy elinde saklaýar.
