Ispaniýanyň ilatynyň geçen ýyl 48 million 592 müň 909 bolandygy mälim edildi. Ýurduň milli statistika institutynyň (INE) maglumatyna görä, Ispaniýanyň ýaşaýjylary ozalky ýyldakydan 507 müň 548 adam artyp, ilkinji gezek 48 milliondan geçipdir. Ilatyň artmagynda daşary ýurtdan göçüp gelenleriň täsiriniň uludygy bellenildi. Ýurduň ýaşaýjylarynyň 42 million 101 müň 407-si ispan raýatlary, 6 million 491 müň 502-si daşary ýurtlulardan ybarat.
Ispaniýada 2000-nji ýylda 1 million 572 müň 13, 2010-njy ýylda 5 million 252 müň 473, 2020-nji ýylda 5 million 402 müň 702 daşary ýurtly hasaba alnypdyr.
Geçen ýyl bolsa ýurtda ýaşaýan migrantlaryň sany ilkinji gezek 6 milliondan geçipdir. Daşary ýurtlularyň arasynda marokkolylar 885 müňden köp ilaty bilen birinji ýeri eýeleýär. Ýurtda 620 müň rumyn, 320 müň kolombiýaly, 290 müň iňlis, 275 müň italýan ýaşaýar.
