Abu-Dabide (BAE) geçirilen duşuşykda «Arkadag» topary Nižnyý Nowgorodyň «Pari NN» toparyny 2:1 hasabynda ýeňdi. 21-nji minutda «Pari NN»-iň hüjümçisi Nikoloz Kutateladze hasaby açdy. Şondan iki minut soň Begmyrat Baýow hasaby deňledi. «Arkadag» toparynyň iň köp pökgi geçiren oýunçysy Didar Durdyýew 68-nji minutda 11 metrlik jerime urgusyny dürs urup, türkmen toparyna ýeňiş getirdi.
18 tapgyrdan soň 24 utuk bilen Russiýanyň premier ligasynda 9-njy orny eýelän, Russiýanyň milli ýygyndysynyň ozalky meşhur oýunçysy Sergeý Ýuranyň tälim berýän «Pari NN» kluby möwsümden öňki taýýarlykda «Arkadag» toparyna gowy bäsdeş boldy.
Şondan öň türkmen kluby Türkiýäniň Antalýa şäherinde geçirilen birinji türgenleşikde ýoldaşlyk duşuşyklarynyň üçüsini geçirdi. Birinji oýunda ol Demirgazyk Makedoniýanyň «Wardar» toparyny 1:0 hasabynda utdy, ondan soňky iki duşuşykda Ukrainanyň «Şahtýoryndan» 1:4 we «Dnepr-1» klubyndan 0:1 hasabynda ýeňildi.
Abu Dabidäki ikinji türgenleşik ýygnanşygynda «Arkadag» topary Sankt-Peterburgdan Russiýanyň häzirki çempiony «Zenit» we Gyrgyzystanyň häzirki iki gezek çempiony we Naýbaşy kubogynyň ýeňijisi Kantdan «Abdyş-Ata» duşuşmagy meýilleşdirýär.
