Kolumbiýanyň günbatarynda bolup geçen güýçli ýertitremäniň netijesinde heläk bolan adamlaryň sany 254-den geçdi. Ýurduň Geologiýa gullugynyň beren maglumatyna görä, XXI asyrda bu ýurtda ýüze çykan iň güýçli we weýrançylykly tebigy apat ýurduň durmuşyny bütinleý togtatdy. 10-njy awgustda irden başlanan 7,4 bal güýjündäki ýerasty sarsgynlar zerarly 2 müň 595-den gowrak adam şikes aldy, dürli çeşmelere görä 3-4 müňden gowrak ýaşaýjy bolsa dereksiz ýiten hasap edilýär.

Tebigy betbagtçylygyň ojagy Ýuwaş ummanyň kenarýakasyndaky San-Hose-del-Palmar şäherçesinde, 80-100 kilometr çuňlukda ýerleşdi. Güýçli sarsgynlar paýtagt Bogotanyň, şeýle hem goňşy Panama we Ekwador döwletleriniň çäklerinde hem duýuldy. Apatyň iň agyr zarbasy ululygy boýunça üçünji şäher bolan Kalä ýetip, ol ýerde onlarça bina doly ýykyldy, şeýle hem Pereýra we Manisales şäherlerinde uly weýrançylyklar emele geldi.

Ýüze çykan agyr ýagdaý sebäpli Kolumbiýanyň Prezidenti Abelardo de la Esprielýa milli derejede adatdan daşary ýagdaý tertibini girizdi we talaňçylygyň öňüni almak maksady bilen komendantlyk sagadyny yglan etdi. Halas ediş çäreleri eýýäm iki gije-gündiz bäri üznüksiz alnyp barylýar. Şol bir wagtyň özünde, bu betbagtçylyk ykdysadyýete hem uly zyýan ýetirip, kolumbiýa kofesiniň eksportyny we Ýuwaş ummandaky esasy Buenawentura portunyň işinde bütinleý bökdençilik döretdi. Porta barýan ýollaryň opurylmalar we süýşgünler sebäpli ýapylmagy hem-de beýleki portlarda ýük ulaglarynyň ýetmezçiligi eksport işlerini çylşyrymlaşdyrdy.

Elektrik energiýasynyň we aragatnaşygyň üznüksiz näsazlyklary şertlerinde ýurtda durmuş doly diýen ýaly togtady. Kalidäki medeni çäreler, futbol boýunça milli çempionatyň oýunlary, şeýle hem Libertadores we Sudamerikana Kubogy ýaly halkara ýaryşlar nämälim möhlete çenli goýbolsun edildi. Ähli güýçler we serişdeler ejir çekenlere kömek etmäge gönükdirilip, kolumbiýaly türgenler hem-de tanymal şahsyýetler ilaty ýaralananlar üçin gan tabşyrmaga çagyrýarlar.

Gyzykly bolup bilerЕЩЕ ОТ АВТОРА