1-3-nji mart aralygynda Aziýanyň iň baý adamy Mukeş Ambaniniň 28 ýaşly ogly – Anant Ambaniniň üç günlük geňeş toýy guraldy. 28 ýaşly Anant Ambani, başga bir hindi milliarderi Wiren Merçantyň 29 ýaşly gyzy – Radika Merçant bilen durmuş gurar. Ilkinji günüň esasy wakasy, dünýä belli pop ýyldyz Riannanyň gatnaşmagynda oturylyşyk guralyp, aýdymçynyň 7 million dollar gazanandygy bellenilýär.
“Reuter” gullugynyň habaryna görä, myhmanlara öňünden dokuz sahypalyk dress-kod iberilipdir. Şenbe günki geňeşe gatnaşanlar Anant Ambaniniň taslamasy “Reliance” haýwanlary halas ediş merkezinde “ýabany tebigata gezelenç” etdiler.
Şeýle hem agşam gala-konsert guralyp, 65 aşpez topary tarapyndan 2 müň 500 dürli nahar hödürlendi. Myhmanlar üçin amatly bolar ýaly, Nýu-Deli we Mumbay arasynda çarter uçuşlary ýola goýuldy.
Arassa baýlygy 111 milliard dollar diýlip çak edilýän Mukeş Ambani, nebiti gaýtadan işlemek, bölek satuw, telekom we sanly akym hyzmatlaryny öz içine alýan “Reliance” konglomeratyny dolandyrýar. Toýuň özi iýul aýynda geçirilmegi meýilleşdirilýär we gürrüňlere görä, toýuň umumy bahasy 53 million dollardan geçýär. Bu waka, şübhesiz, dünýä taryhynyň iň kaşaň we täsirli toýlarynyň sanawynda aýratyn orun eýelär.
Iýulda boljak toýa 1200 adam çagyrylýar. Myhmanlaryň arasynda nikalaşýanlaryň maşgalalaryna ýakyn adamlardan başga-da dünýäde iň abraýly adamlar Bill Geýts, Mark Sukerberg we Hillari Klinton we başgalar bar.
