AFK Çempionlar Ligasynda çärýek finalyň 1-nji duşuşyklary geçirildi. Çempionlygyň esasy dalaşgärlerinden Saud Arabystanynyň “Al Hilal” topary öz meýdançasynda ýurduň başga bir öňdebaryjy toparlaryndan “Al-Ittihad” klubuny 2-0 hasabynda ýeňlişe sezewar etdi. Er-Riýad şäheriniň wekiline ýeňiş getiren gollary 40-njy minutda penaltiden Aleksandar Mitrowiç bilen 42-nji minutda Salem Al-Dawsari geçirdi. Duşuşygyň 66-njy minutynda “Al-Ittihad” toparynyň fransiýaly ýarymgoragçysy N’Golo Kante gyzyl kart aldy.
BAE-niň “Al-Ain” topary bilen Saud Arabystanynyň “Al Nassr” toparynyň arasyndaky 1-nji oýunda ýer eýeleri 1-0 hasabynda ýeňiş gazandy. Duşuşykdaky ýeke-täk goly 44-nji minutda Rahimi tora salmagy başardy.
“Hýundai” kompaniýasynyň iki wekiliniň, ýagny 2 koreý klubunyň özara duşuşygynda ýeňiş gazanan bolmady. “Çeonbuk Hýundai Motors” bilen “Ulsan Hýundai” toparlarynyň arasyndaky oýun 1-1 hasabynda deňlikde tamamlandy (Son Min Kýu 4 – Li Mýun Çže 77).
Hytaýyň Szinan şäherinde oýnalan «Şandun Taýşan» — «Ýokohama F. Marinos» duşuşygynda myhmançylykdaky ýapon kluby 2-1 hasabynda ýeňiş gazandy. Duşuşykda ýapon klubunyň gollaryny Anderson Lopes (7) bilen Ýan Mateus (69), ýer eýeleriniň goluny-da Çžen Pu (90+1) geçirdi.
Çärýek finalyň jogap oýunlary 11-12-13-nji martda geçiriler.
