6-njy aprelde dolandyryjy koalisiýa girýän “Glaz” partiýasy tarapyndan hödürlenen Slowakiýanyň parlamentiniň başlygy, Peter Pellegrini ýurtda geçirilen Prezident saýlawlarynyň ikinji tapgyrynda ýeňiş gazandy. Bu barada ýurduň Statistika edarasy habar berdi.
Ses berişligiň netijelerine görä, saýlawçylaryň 53,12 göterimi Pellegrinä, 46,87 göterimi bolsa, onuň esasy bäsdeşi – Slowakiýanyň daşary syýasat edarasynyň öňki başlygy Iwan Korçoko ses berdi.
23-nji martda geçirilen saýlawlaryň birinji tapgyrynda dokuz dalaşgäriň hiç biri-de 50 göterimden gowrak ses alyp bilmedi. Şoňa görä hem saýlawlaryň ikinji tapgyry geçirildi. Birinji tapgyrda 42,5 göterim ses bilen Korçok, 37 göterim ses bilen Pellegrini öňe saýlanypdy.
Ikinji tapgyrda Pellegrini üçin 1 million 409 müň 255 saýlawçy, Korçok üçin 1 million 243 müň 709 saýlawçy ses berdi. Umuman alanyňda, 4,3 million adamyň Slowakiýada ses bermäge hukugy bar. Saýlawlaryň ikinji tapgyryna gatnaşanlaryň sany 61,14 göterime, birinji tapgyryna gatnaşanlaryň sany bolsa, 51,91 göterime deň boldy.
Slowakiýanyň Hökümet başlygy Robert Fiso saýlawlaryň öňüsyrasynda Pellegrinini goldaýandygyny aýtdy we ony “parahatçylygyň gymmatyna düşünýän aram dalaşgär” diýip baha berdi. Slowakiýada Prezidentiň wezipesi köplenç wekilçilikli häsiýete eýe bolup, ýurdy Premýer-ministr dolandyrýar. Şeýle-de bolsa, Slowakiýanyň Prezidentiniň parlament tarapyndan kabul edilen kanunlara weto bermäge, halkara şertnamalaryny tassyklamaga hukugy bar. Ol ýaragly güýçleriň serkerdebaşysy bolup, kazylary wezipä belleýär. Geçen ýylyň 30-njy sentýabrynda “Sosial demokratiýa ugry” partiýasynyň başlygy Roberto Fiso ýurtda geçirilen parlament saýlawlarynda ýeňiş gazanyp, ýurduň Premýer-ministri wezipesine bellendi.
Häzirki saýlawlar Slowakiýa garaşsyzlygyny alanyndan soň altynjy Prezident saýlawlarydyr. Slowakiýa Respublikasy – Merkezi Ýewropada ýerleşýän döwlet bolup, ilaty 5 million 455 müň adama deňdir. Paýtagty Bratislawa. Ýurt 1993-nji ýylyň 1-nji ýanwarynda garaşsyzlygyna eýe boldy.
