AFK Çempionlar Ligasynda 2023/24 möwsüminiň finala çykan toparlar belli boldy. Ýarym finalyň jogap oýunlaryndan soň BAE-niň “Al-Ain” topary bilen Ýaponiýanyň “Ýokohama F. Marinos” topary finalda duşuşarlar.
Bir hepde öň öz meýdançasynda 4-2 hasabynda ýeňiş gazanan “Al-Ain” myhmançylykda Saud Arabystanynyň “Al Hilal” toparyndan 2-1 asgyn geldi. Çekeleşikli geçen oýunda ýer eýeleriniň gollaryny Ruben Neweş (4 p) bilen Salem Al-Dowsari (51), Emirlikleriň wekiliniň goluny-da 12-nji minutda Erik geçirdi. Şunlukda, Hernan Kresponyň tälim berýän Al-Ain topary 2003-nji, 2005-nji we 2016-njy ýyllardan soň 4-nji gezek AFK Çempionlar Ligasynyň finalyna oýnamaga hukuk gazandy. Olar 2003-nji ýylda çempionlyk gazanypdylar.
Günorta Koreýadaky duşuşykda “Ulsan HD” toparyndan 1-0 utulan “Ýokohama F. Marinos” topary Ýaponiýada 3-2 hasabynda üstün çykdy. Geçirilen gollaryň 5-si hem 1-nji ýarymda derwezä girizilip, ilki bilen ýer eýeleri ýarym sagadyň içinde Uenaka (13, 30) hem-de Anderson Lopesiň (21) gollary esasynda 3-0 hasabynda öňe saýlandy. Koreýler 1-nji ýarym tamamlanmanka, Mateus Salesiň (35) hem-de Boýaniçiň (42 p) gollary bilen 2 oýnuň netijesi boýunça hasaby deňlemegi başardy. Goşmaça wagtda-da hasap üýtgemänsoň, penaltiler ýeňijini kesgitlemeli boldy. Bu urgularda-da ýeke gezek hem ýalňyş goýbermedik ýaponlar 1989/90 möwsüminden soň, ýagny 34 ýyldan soň taryhynda 2-nji gezek finala çykdy. Ýokohama şäheriniň wekili şol finalda Hytaýyň “Lýaonin Hunin” toparyndan 2 oýnuň netijesi boýunça ýeňlipdi.
“Ýokohama F. Marinos” bilen “Al-Ain” toparlarynyň arasyndaky final duşuşyklarynyň birinjisi 11-nji maýda Ýaponiýada, jogap oýny bolsa 25-nji maýda BAE-de oýnalar.
