Fransiýanyň Luwr muzeýinde Mona Lizanyň portretini görmek üçin birnäçe sagat nobata durmaly, soňra bolsa, Leonardonyň bu ajaýyp eserini synlamak üçin bary-ýogy 30 sekunt wagtyň bar. “Euronews”-yň habaryna görä, golaýda muzeýiň ýolbaşçylary portrete aýratyn otagyň zerurdygyny mälim etdiler.
Her ýylda 10 milliona golaý adam Mona Lizany görmek Pariže gelýär we iki sagatdan gowrak nobata durýarlar. Bu dünýäniň iň köp görülýän sungat eseridir. Sungaty halaýanlar ahyrsoňy Mona Lizanyň portretiniň asylgy duran zalyna ýetenlerinde, ony aýdyň görüp bilmeýändiklerine göz ýetirýärler. Sebäbi uly bolmadyk portretiň golaýynda germew goýlup, ýüzi hem gorag aýnasy bilen örtülendir.
-Uly zaldaky Mona Lizanyň portreti gaty kiçi görünýär. Bu bolsa sungat eseriniň awtory Leonardo da Winçiniň pikirlerine çapraz gelýär. Çünki Da Winçiniň özi kartina bilen adamyň arasynda şahsy gatnaşygyň bolmagyny isläpdi – diýip, Luwr muzeýiniň baş müdiri Winsent Delewen belledi.
Howpsuzlyk çäreleri sebäpli, muzeýe gelýänler suraty 30 sekuntdan köp synlap bilmeýärler. Myhmanlar Mona Lizany göjek bolup, ol ýerdäki beýleki suratlara düýbünden üns bermeýärler. Şol sebäplere görä hem, Luwruň müdirligi portretiň ýerini üýtgetmek barada karara geldi. Bu işler Luwr muzeýine täze girelge açmak we ýene-de iki zal döretmek ýaly düýpli abatlaýyş işlerini talap eder. Olaryň biri Mona Lizanyň täze öýüne öwrülip, täze şertler Luwrdaky nobatlary azaldyp, portretiň ýanyna göni barmaga mümkinçilik döreder.
Leonardonyň sungat eserini ykjam we degişli çäreler bilen ýerleşdirmek üçin ýarym milliard ýewro gerek bolar. Fransiýanyň Medeniýet ministrligi Luwruň başlangyjyny goldaýar, indi diňe medeniýet pudagynyň işgärleriniň billerini berk guşamaga çagyran Maliýe ministri Bruno Le Merany ynandyrmak galýar.
Luwr muzeýi 2021-nji ýylda mugt giriş mümkinçiligi bolan onlaýn platformany ýola goýup, onda muzeýiň 480 müňden gowrak çeper eserlerini synlamaga mümkinçilik döretdi. Platformada muzeýiň bölümlerindäki sungat eserleri hödürlenip, Yslam sungatyndan we Galkynyş döwrüniň heýkellerinden başlap, Müsüriň gadymy döwürlerine we dünýäniň dürli ýurtlarynyň belli suratkeşleriň kartinalaryna çenli synlap bolýar. Internet ulanyjylar islendik kompýuterden we smartfondan muzeýiň eserlerini gözden geçirmäge mümkinçilik berýän ýörite interaktiw karta bilen bir otagdan beýleki otaga päsgelçiliksiz geçip bilýärler.
