Kardiff şäherinde Şotlandiýanyň, Uelsiň we Demirgazyk Irlandiýanyň öz ykbalyny kesgitlemegi goldaýan syýasy partiýalarynyň liderleri özara düşünişmek hakyndaky Ähtnama gol çekdiler. Bu resminama laýyklykda, taraplar birek-biregi has ýakyn hyzmatdaşlyga çagyrdylar we Beýik Britaniýanyň hökümetini bolup biljek konstitusion üýtgeşmelere taýýarlyk görmäge çagyrdylar. Duşuşyga Şotlandiýanyň Milli partiýasynyň lideri Jon Suinni, «Pleýd Kamri» partiýasynyň lideri Ruan ap Iorwert, şeýle hem «Şinn Feýn» partiýasynyň ýolbaşçylary gatnaşyp, olar sebit hökümetleriniň adyndan däl-de, partiýalaryň wekilleri hökmünde çykyş etdiler.

Bu ylalaşyk Şotlandiýanyň parlamentine we Uelsiň Seneddine geçirilen saýlawlardan dört aý soň gazanyldy. Häzirki wagtda Birleşen Patyşalygyň üç sebit hökümetiniň ählisine ilkinji gezek garaşsyzlygy goldaýan partiýalaryň birinji ministrleri ýolbaşçylyk edýär. Liderler her bir ýurduň halkynyň öz geljegini demokratik ýol bilen kesgitlemäge mümkinçiliginiň bolmalydygyny nygtap, Beýik Britaniýanyň hökümetine konstitusion üýtgeşmelere ýardam bermek baradaky talabyny bildirdiler. Şunda Ähtnamada her ýurisdiksiýanyň özboluşly syýasy şertleriniň we maksatlarynyň bardygy hem ykrar edildi.

Taraplar konstitusion meseleler bilen birlikde, ykdysadyýet, gaýtadan dikeldilýän energiýa çeşmeleri we Ýewropa Bileleşigi bilen gatnaşyklar babatda hem hyzmatdaşlygy güýçlendirmek barada ylalaşdylar. Resminamada Brexit-iň ykdysadyýete ýetiren zyýany bellenilip, bu ýurtlaryň geljeginiň Ýewropa Bileleşigi bilen baglydygy öňe sürülýär.

Öz gezeginde, Beýik Britaniýanyň Premýer-ministriniň metbugat wekili Endi Bernhem Hökümet tarapyndan beýleki konstitusion sala salyşyklary geçirmäge däl-de, eýsem maşgalalaryň maliýe ýagdaýyna düşýän ýüküň azaldylmagyna hem-de ykdysady howpsuzlygyň ýokarlandyrylmagyna esasy üns berilýändigini we bileleşige ygrarly galýandyklaryny mälim etdi.

Gyzykly bolup bilerЕЩЕ ОТ АВТОРА