Nepally daga dyrmaşyjy hem-de ýolbelet Kami Rita Şerpa 29-njy gezek Ewerest dagynyň çür depesine çykyp, bu ýere iň köp dyrmaşan adam hökmünde rekord goýdy. Şerpa geçen ýyla çenli bu rekordy elinde saklaýardy, emma Pasan Dawa Şerpa atly başga bir ýolbelet daga çykmagyň sany boýunça onuň yzyndan ýetipdi. Şeýlelikde ol rekordyny yzyna almak üçin geçen ýyl iki gezek dagyň iň beýik depesine çykdy. Şeýle-de bolsa ol rekord goýmak aladasynyň ýokdugyny, diňe işini edýändigini aýdýar.
Şerpa beýikligi 8 müň 849 metrlik daga ilkinji gezek 1994-nji ýylda çykypdyr. Bu syýahatyň guraýjysy Minma Şerpa, “Kami Rita şu gün irden depä baryp ýetdi. Ewerestiň üstüne 29 gezek çykyp täze rekordy goýdy” diýip belledi.
Ýigrimi ýyldan gowrak wagt bäri daga dyrmaşýanlaryň ýanyndan ýolbelet bolup zähmet çekýän Şerpa 1994-nji ýyldan bäri her ýyl diýen ýaly bu daga dyrmaşýar we daga dyrmaşyjylara ýolbelet bolup kömek edýär.
Şerpa geçen hepde daga dyrmaşýanlaryň esasy düşelgesinde wagty “Instagram” akkaundynda “Ýeriň iň beýik nokadyna 29-njy gezek barmak üçin yzymyza dolanýarys… Bir adamyň käri, başga bir adamyň arzuwy diýip ýazypdy.
54 ýaşly Şerpa mundan ozal dünýäniň ikinji iň beýik dagy hasaplanýan Pakistandaky “K2” bilen bir hatarda beýikligi 8 müň metr töweregi bolan beýleki birnäçe daga hem çykypdy.
414 adama rugsat berildi
Nepal şu ýyl aprel aýyndan iýunyň başyna çenli 414 adama Ewerest dagyna çykmaga rugsat beripdi. Dünýäniň iň beýik 10 dagynyň 8-i Nepalda ýerleşýär. Daga çykmaga howanyň maýyl hem-de ýeliň az bolan bahar aýlarynda rugsat berilýär. Geçen ýyl Ewereste 600 adam çykypdyr.
