Ispaniýanyň çempionaty «La Ligada» möwsümiň iň uly sýurprizini eden topary «Žirona» 38-nji tapgyrda aşaky liga düşen «Granadany» kabul etdi. Duşuşykda «Žirona» topary 7-0 hasabynda ýeňiş gazandy. Katalonýalylara uly hasaply ýeňiş getiren gollaryň 3-sini 44-nji (p), 75-nji hem-de 90-njy (p) minutlarda Artýom Dowbyk geçirdi. Beýleki gollary-da 30-njy minutda Erik Garsiýa, 33-nji we 54-nji minutlarda Wiktor Sygankow hem-de 78-nji minutda Kristian Stuani derwezä girizdi. Oýnuň 61-nji minutynda «Granadadan» Fakundo Pellistri gyzyl kart aldy.
Şeýlelikde, «La Ligada» 4-nji möwsümini geçirýän «Žirona» topary utugyny 81-e çykaryp, çempionaty 3-nji orunda tamamlamagy başardy. Geljek möwsümde UEFA Çempionlar Ligasyna gatnaşjak klubuň ukrainaly hüjümçisi Dowbyk soňky oýunda het-trik etmek bilen «La Ligadaky» gollarynyň sanyny 24-e ýetirdi we 23 golly Aleksander Sörlotdan öňe saýlandy.
