Bütindünýä Syýahatçylyk Guramasynyň pudaga degişli maglumatlary taýýarlady. Bu maglumata görä, geçen ýyl dünýäde 1,3 milliard adam başga bir ýurda syýahat edipdir. Fransiýa bolsa, ilkinji gezek 100 million syýahatçy kabul edip, bu sepgide ýeten ilkinji ýurt bolupdyr. Fransiýa köp ýyldan bäri syýahatçylyk babatda dünýäde öňdeligini dowam etdirýär. Bu ýyl Parižde geçiriljek tomusky Olimpiýa oýunlary hem ýurduň syýahatçylarynyň sanyny has-da artdyrar. Şeýle hem bu çäre ýurduň tanyşdyrylmagynda hem uly ähmiýete eýe bolar. 2023-nji ýylda Ýewropanyň güneşli ülkesi Ispaniýa 85 million syýahatçy barypdyr. Amerika baranlaryň sany bolsa 66 million 480 müň bolup, bu ugurda üçünji bolupdyr. Ispaniýanyň goňşusy Italiýa baran daşary ýurtlularyň sany 57 milliona ýetipdir. Arzan bahaly bolmagy bilen tanalýan Türkiýe 55 million syýahatçy bilen bäşinji ýeri eýeläpdir.
Bütindünýä Syýahatçylyk Guramasy 2010-njy ýyldan bäri ýurtlaryň syýahatçylarynyň hasabyny ýöredýär. Şol ýyldan bäri Fransiýa bu sanawda birinjiligi saklap gelýär. Ýurduň esasy myhmanlary goňşy Ýewropa ýurtlary hasaplanýar. Ýurduň güýmenje merkezleri, Eýfel diňi, muzeýleri, deňzi kenarlary, taryhy ýerleri we aşhanasy syýahatçylary özüne çekýär. Pandemiýadan ozal ýurda ýylda 70-80 million töweregi syýahatçy barýan bolsa, indi ilkinji gezek 100 million syýahatçy barypdyr.
Ikinji orundaky Ispaniýa hem öz rekordyny täzeläpdir. 85 milliondan gowrak syýahatçyny kabul eden ýurt bu pudakdan 92 milliard dollar girdeji gazanypdyr. Şeýlelikde her syýahatçydan ortaça 1080 dollar girdeji gazanylypdyr. Üç ünji orundaky ABŞ bu pudakdan 176 milliard dollar girdeji gazanypdyr. Şeýlelikde syýahatçylar bu ýurtda ortaça 2 müň 645 dollar çykdajy edipdirler.
Sanawyň ýokarky basgançagyndaky beýleki ýurtlar: Meksika (42,15 million), Birleşen Patyşalyk (37,22 million), Germaniýa (34,80 million), Gresiýa (32,74 million), Awstriýa (30,91 million), Tailand (28,15 million), Saud Arabystany (27,12 million) we Ýaponiýa (25,07 million).
