UEFA-nyň täze ýaryşy bolan Ýewropa Konferensiýa Ligasynda 3-nji möwsümiň çempiony Gresiýanyň “Olimpiakos” topary boldy. Gresiýanyň paýtagty Afinyda geçirilen finalda “Olimpiakos” topary Italiýanyň “Fiorentina” toparynda goşmaça wagtda 1-0 hasabynda üstün çykdy. “AEK Arena” stadionyndaky finala 26 müň 842 janköýer tomaşa etdi. Portugaliýaly Artur Soareş Diaşyň eminlik eden oýnunda italýan topary has erjel oýun görkezdi, has köp pursat döretdi. Ýöne netijede “Olimpiakosyň” finala çykmagynda uly rol oýnan marokkoly hüjümçisi Aýub El-Kaabiniň 116-njy minutdaky goly esasynda taryhy çempionlygyny baýram etdi. “Olimpiakos” topary UEFA-nyň ýaryşlarynda çempionlyk gazanan ilkinji grek kluby hökmünde hasaba alyndy. Şeýle-de, Gresiýa UEFA-nyň ýaryşlarynda kluby çempionlyk gazanan 18-nji ýurt boldy.
“Olimpiakos” toparynyň hüjümçisi El-Kaabi pleý-off tapgyrlarynda 11 gol geçirip, UEFA-nyň ýaryşlarynda bu görkezijä ýeten ilkinji oýunçy boldy. Ronaldo, Benzema, Falkao dagy pleý-off duşuşyklarynda bir möwsümde 10 gol geçiripdi.
“Olimpiakosyň” ispaniýaly tälimçisi Hoze Luis Mendilibar 12 aý öň Sewilýa toparyna UEFA Ýewropa Ligasynyň kubogyny gazandyrypdy. UEFA-nyň ýaryşlarynda yzly-yzyna 2-nji kubogyny gazanan Mendilibar 2 topara-da ýaz aýlarynda tälimçi bellenipdi.
“Fiorentina” topary bolsa UEFA-nyň täze ýaryşynda yzly-yzyna 2-nji gezek finaldan boş gaýtdy. “Olimpiakosyň” garşysyna esasy düzümde meýdança çykan 11 futbolçynyň 8-si geçen ýylky finalda-da başlangyç sanawda oýnapdy.
2022-nji ýyldan bäri geçirilýän bu ýaryşda ilki “Roma”, geçen ýylda-da “West Ham” topary çempionlyk gazandy.
