Gazagystanyň paýtagty Astanada Çarwadarlaryň V Bütindünýä oýunlaryna gatnaşyjylary kabul etmäge taýýarlyk görülýär. Bu ýylky sport çäreleri 8-15-nji sentýabr aralygynda “Uly sährada duşuşyk” şygary astynda geçiriler. Bu çärä 100 ýurtdan 4 müň türgen gatnaşar diýlip garaşylýar. Oýunlaryň guramaçylary Astanada boljak oýunlara taýýarlyk işleri barada maslahat geçirdiler. Maslahatyň barşynda ýaryşa gatnaşyjylaryň eşikleriniň we medallarynyň nusgalary görkezildi.
Çarwadarlaryň Bütindünýä oýunlarynyň maksatnamasy sport, medeniýet we ylym ýaly üç esasy ugry öz içine alýar. Guramaçylaryň pikiriçe, bu çäre çarwa medeniýetini gorap saklamaga, öwrenmäge we mundan beýläk-de ösdürmäge ýardam berer.
-Kazanat” aýlawyndan uzakda bolmadyk ýerde ýerleşýän“Çarwadarlaryň dünýäsi ”etno obasynda we onuň töwereklerinde at çapyşyklar, “kok-boru” (gök böri), şuňkarlar bilen aw awlamak boýunça ýaryşlar guralar. Žaksylyk Uşkempirow adyndaky başa-baş göreş sungaty we “Alau” köşgünde milli göreş boýunça ýaryşlar, “Duman” myhmanhana toplumynda bolsa, intellektual oýunlar geçiriler – diýip, Gazagystan Respublikasynyň sport we syýahatçylyk ministriniň orunbasary Serik Žarasbaýew aýtdy.
Bäsleşikler sportuň 21 sany milli görnüşleri boýunça geçiriler. Oýunlaryň açylyş dabarasy “Astana Arena” stadionynda, ýapylyş dabarasy bolsa, “Kazanat” aýlawynda guralar. Bu ýaryşlara toma etmäge Gazagystanyň paýtagtyna 100 müňden gowrak syýahatçynyň gelmegine garaşylýar. Çarwadarlaryň bütindünýä oýunlary – sportuň etnik görnüşleri boýunça halkara ýaryşlardyr.
2014-nji ýylda Gyrgyz Respublikasynda geçirilen Çarwadarlaryň I Bütindünýä oýunlaryna 18 ýurtdan 300 töweregi türgen gatnaşyp, sportuň 11 milli görnüşi boýunça bäsleşipdiler. 2016-njy ýylda geçirilen II oýunlarda 53 ýurtdan müňden gowrak türgen gatnaşypdy. 2018-nji ýylda Çarwadarlaryň III bütindünýä oýunlary Gyrgyzystanyň Issyk-Kul kölüniň kenarynda geçirilipdi. 2022-nji ýylda Çarwadarlaryň IV bütindünýä oýunlary Türkiýäniň Bursa welaýatynyň Iznik etrabynda geçirilipdi. Şol döwürde oýunlar ilki başdan Gyrgyzystanda guralansoň, Gyrgyzystanyň awtorlygyny saklamak şerti bilen Türkiýede guramak ylalaşylypdy. Bu oýunlara dünýäniň 102 ýurdundan 3 müňden gowrak türgen gatnaşypdy. Bäsleşikler sportuň 13 görnüşi boýunça geçirilip, türgenler göreş, atçylyk sporty we ýaýdan ok atmak ýaly ugurlar boýunça ukyplaryny synapdylar.
Şeýle hem 2021-nji ýylda çarwadarlaryň bütindünýä oýunlarynyň ÝUNESKO-nyň maddy däl medeni mirasynyň sanawyna girizilendigi habar berildi. Bu karar guramanyň Pariždäki mejlisinde kabul edildi.
