Futbol boýunça milli ýygyndylaryň arasyndaky iň gadymy ýaryş hasaplanýan Kopa Amerika – Günorta Amerikanyň çempionaty ABŞ-da geçiriler. Soňky çempion Argentina bilen Kanadanyň arasyndaky duşuşyk 48-nji Kopa Amerika ýaryşynyň ilkinji oýny bolar. Duşuşyk daňdan 05:00-da başlanar. Çempionata 16 ýygyndy – Günorta Amerikanyň ähli topary (10) bilen bilelikde, Demirgazyk Amerikadan hem 6 ýygyndy wekilçilik edýär. “A” toparçada soňky çempion Argentinanyň, Perunyň, Çiliniň, Kanadanyň, “B” toparçada Meksikanyň, Ekwadoryň, Wenesuelanyň, Ýamaýkanyň, “C” toparçada ýer eýeleri ABŞ-nyň, Urugwaýyň, Panamanyň, Boliwiýanyň, “D” toparçada-da Braziliýanyň, Kolumbiýanyň, Paragwaýyň hem-de Kosta Rikanyň ýygyndylary duşuşar. Toparçalardaky duşuşyklar Aşgabat wagty bilen 03:00-da, 05:00-da hem-de 06:00-da başlanar.
Her toparçada 1-2-nji orny eýelänler ýaryşy dowam eder. Çärýek finalyň oýunlary 5-6-7-nji iýulda, ýarym finalyň duşuşyklary 10-njy we 11-nji iýulda oýnalar. 3-nji ýer üçin duşuşyk 14-nji iýulda oýnalsa, final 15-nji iýulda geçirilip, 48-nji Kopa Amerikanyň çempiony belli bolar.
Soňky çempion Argentinanyň ýygyndysy çempionlygyň iň esasy dalaşgäri hasaplanyp, tälimçi Skalini düzüme Messi, Di Mariýa, Martines ýaly ýyldyzlary çagyrdy. 2-nji iň esasy dalaşgär Braziliýa hasaplanyp, olaryň düzüminde Winisius Junior, Rodrigo dagy bar.
IŇ KÖP ARGENTINA HEM-DE URUGWAÝ ÇEMPION BOLDY
Ilkinji gezek 1916-njy ýylda geçirilen milli ýygyndylaryň arasyndaky iň gadymy futbol ýaryşy – Kopa Amerikada Urugwaýyň hem-de Argentinanyň ýygyndylary 15 çempionlyk bilen öňde barýarlar. Argentinler 14 gezek, Urugwaý 5 sapar finalda ýeňildi. Braziliýanyň ýygyndysy 9 gezek çempion bolup, olar 12 saparam kümüş medaly eýeledi. Paragwaýdyr Çiliniň, Perunyň 2, Boliwiýanyň hem-de Kolumbiýanyň 1 çempionlygy bar. Günorta Amerikanyň 10 ýygyndysyndan diňe Wenesuela hem-de Ekwadoryň ýygyndysyna çempionlyk gazanmak başartmady.
48-nji gezek geçirilýän ýaryşa Urugwaý 46-njy, Argentina 44-nji, Çili 41-nji, Paragwaý 39-njy, Braziliýa 38-nji sapar gatnaşýar.
Dürli ýyllarda, dürli formatlarda geçirilen bäsleşige 1990-njy ýyldan soň Aziýadyr Demirgazyk Amerikanyň ýygyndylary hem çagyrylyp başlandy. Myhman topar hökmünde gatnaşýan Meksikanyň ýygyndysy 1993-nji hem-de 2001-nji ýylda finala-da çykypdy. Meksika 11-nji, Kosta Rika 6-njy, ABŞ 5-nji gezek Kopa Amerikada çykyş eder. Aziýadan Ýaponiýa 2, Katar 1 gezek gatnaşypdy.
| 21-nji iýun (anna) | 5:00 | Argentina – Kanada |
| 22-nji iýun (şenbe) | 5:00 | Peru – Çili |
| 23-nji iýun (ýekşenbe) | 3:00 | Ekwador – Wenesuela |
| 23-nji iýun (ýekşenbe) | 5:00 | Meksika – Ýamaýka |
| 24-nji iýun (duşenbe) | 3:00 | ABŞ – Boliwiýa |
| 24-nji iýun (duşenbe) | 6:00 | Urugwaý – Panama |
| 25-nji iýun (sişenbe) | 3:00 | Kolumbiýa – Paragwaý |
| 25-nji iýun (sişenbe) | 6:00 | Braziliýa – Kosta Rika |
| 26-njy iýun (çarşenbe) | 3:00 | Peru – Kanada |
| 26-njy iýun (çarşenbe) | 6:00 | Çili – Argentina |
| 27-nji iýun (penşenbe) | 3:00 | Ekwador – Ýamaýka |
| 27-nji iýun (penşenbe) | 6:00 | Wenesuela – Meksika |
| 28-nji iýun (anna) | 3:00 | Panama – ABŞ |
| 28-nji iýun (anna) | 6:00 | Urugwaý – Boliwiýa |
| 29-njy iýun (şenbe) | 3:00 | Kolumbiýa – Kosta Rika |
| 29-njy iýun (şenbe) | 6:00 | Paragwaý – Braziliýa |
| 30-njy iýun (ýekşenbe) | 5:00 | Argentina – Peru |
| 30-njy iýun (ýekşenbe) | 5:00 | Kanada – Çili |
| 1-nji iýul (duşenbe) | 5:00 | Meksika – Ekwador |
| 1-nji iýul (duşenbe) | 5:00 | Ýamaýka – Wenesuela |
| 2-nji iýul (sişenbe) | 6:00 | ABŞ – Urugwaý |
| 2-nji iýul (sişenbe) | 6:00 | Boliwiýa – Panama |
| 3-nji iýul (çarşenbe) | 6:00 | Braziliýa – Kolumbiýa |
| 3-nji iýul (çarşenbe) | 6:00 | Kosta Rika – Paragwaý |
