Germaniýada ilat sany barada ýaýradylan maglumat çak edilişinden pes boldy. Şeýlelikde 2022-nji ýylyň maý aýynda ýurduň ilatynyň 82,7 million bolandygy mälim edildi. Federal statistika edarasynyň ýaýradan maglumatyna görä, ýurduň ilaty 2011-nji ýyldan 2022-nji ýyla çenli 2,5 million artypdyr. Bu görkezijiniň garaşylandan 1,4 million azdygy mälim edildi.
Şeýle hem 2011-nji ýylda ýurduň ýaşaýjylarynyň 6,2 milliony daşary ýurtlular bolan bolsa, bu görkeziji 2022-nji ýylda 10,9 milliona ýetipdir. Bu görkeziji hem çak edilişinden 1 million az bolup çykypdyr.
Ilat sany baradaky çaklamalar ýaýradylmazdan ozal ýurda gelen migrantlaryň çaga dogluşynyň we barha garraýan ilatyň öwezini dolandygy we ilatyň 300 müň artyp, 84,7 milliona ýetendigi çaklanylýardy.
Statistika edarasynyň maglumatyna görä, iri şäherleriň arasynda ilat artyşy iň köp Bremende hasaba alnyp, şäheriň ilaty 1,8 göterim köpelipdir. Kölnüň ilaty bolsa 5,9 göterim azalypdyr. Bawarýa sebitiniň statistika edarasynyň başlygy Tomas Gössl ýiti azalyşa garamazdan, Kölnüň entegem bir million ilatly şäher statusyny goraýandygyna ünsi çekdi.
Ilat Germaniýadaky 10 müň 786 ýerli häkimiýetiň ählisinden alnan maglumatlar esasynda sanalypdyr. Maglumatlar ýerli häkimiýetleriň 56 göteriminde ilatyň azyndan 1 göterim azalandygyny ýüze çykardy.
Germaniýada adaty usullar arkaly ilat ýazuwy soňky gezek 1987-nji ýylda geçirildi. Şondan bäri Federal statistika edarasy 10 ýyldan bir gezek hasaba alyş ofislerinden alnan maglumatlar esasynda ilatyň sany barada maglumat taýýarlaýar.
Federal statistika edarasynyň başlygy Rut Brand ilat ýazuwynyň Germaniýa üçin tükelleýiş işi bolup durýandygyna ünsi çekip, anyk maglumatlaryň näçeräk welosiped ýodasyna, çagalar bakja-bagyna, mekdeplerde synp otagyna zerurlyk duýulýandygyny anyklamak üçin ähmiýetlidigini aýdýar.
