Germaniýada dowam edýän 17-nji Ýewropa çempionatynda ilkinji çärýek finalçy belli boldy. “A” hem-de “B” toparçada ikinji orny eýelän degişlilikde, Şweýsariýa bilen soňky çempion Italiýanyň ýygyndylary duşuşdy. Finalyň geçiriljek stadionynda oýnalan duşuşykda şweýsarlar 2-0 hasabynda ýeňiş gazandy. Italýanlary taryhynda 9-njy gezek ýeňen şweýsarlaryň gollaryny 37-nji minutda Remo Froýler hem-de 46-njy minutda Ruben Wargas geçirdi. 1-nji golda şweýsariýaly futbolçylar 31 gezek özara paslaşyp, çempionatyň rekordyny täzelediler. Şeýlelikde, Şweýsariýanyň ýygyndysy soňky çempion Italiýanyň ýygyndysyny 2-0 hasabynda ýeňip, ýaryşdan çykardy. Ýewropa çempionatynda bassyr 3-nji gezek soňky çempion 1/8 finalda utulyp, öýlerine dolandy. 2016-njy ýylda 1/8 finalda çempion Ispaniýany Italiýa, 2020-nji ýylda Portugaliýany Belgiýa, 2024-nji ýylda-da Italiýany Şweýsariýa ýeňip, ýaryşdan çykardy.
Şweýsariýa soňky gezek Italiýany 1993-nji ýylda ýeňip, 11 oýundan bäri garşydaşyny utup bilmän gelýärdi. Italiýanyň ýygyndysy soňky 5 ýaryşda ilkinji gezek çärýek finala çykyp bilmedi.
