Dünýä futbolynyň belli tälimçilerinden şwesiýaly Swen-Goran Eriksson 76 ýaşynda aradan çykdy. 1948-nji ýylyň 5-nji fewralynda dünýä inen Eriksson ýurdunyň “Torsbi”, “Sifhalla”, “Karlskoga” ýaly klublarynda futbol oýnady. 1977-nji ýylda tälimçilige baş goşan Swen-Goran Eriksson Şwesiýanyň “Degerfors” (1977-78), “Gýoteborg” (1979-82), Portugaliýanyň “Benfika” (1982-1984, 1989-1992), Italiýanyň “Roma” (1984-87), “Fiorentina” (1987-89), “Sampdoriýa” (1992-1997), “Lasio” (1997-2001), Angliýanyň “Mançester Siti” (2007-08), “Lester Siti” (2010-11) hem-de Hytaýyň “Guangžou R&F” (2013-14), “Şanhaý SIPG” (2014-16), “Şenzen” (2016-17) klublarynda, şol sanda Angliýanyň (2001-06), Meksikanyň (2008-09), Kot-d’Iwuaryň (2010) hem-de Filippinleriň (2018-19) milli ýygyndylaryna tälimçi boldy.
Eriksson “Benfika” bilen 3, “Lasio” bilenem 1 gezek milli çempionatda çempion bolmagy başardy. “Gýoteborga” 1982-nji ýylda UEFA Kubogyny gazandyran Eriksson “Lasio” bilen UEFA Kubogyny hem-de ozalky UEFA Kubokçylaryň Kubogy ýaryşynyň çempionlygyna ýetdi. Ol karýerasy boýunça 18 kubok gazandy. Angliýanyň milli ýygyndysyna tälim beren ilkinji daşary ýurtly tälimçi bolan Eriksson tälimçilik karýerasyndaky 1207 duşuşygyň 629-synda ýeňiş gazandy, 270-sinde ýeňildi.
