UEFA Çempionlar Ligasynyň final tapgyryna gatnaşjak toparlaryň ählisi belli boldy. Duşuşyklar diýseň çekeleşikli, aldym-berdimli ýagdaýda geçdi.
Slowakiýanyň “Slowan Bratislawa” topary öz meýdançasynda Daniýanyň “Midtýullann” toparyny kynlyk bilenem bolsa 3-2 hasabynda ýeňdi. Myhmanlar 2-1 hasabynda öňe saýlansa-da, soňky 10 minutda 2 gol geçiren “Slowan” taryhynda ilkinji gezek UEFA Çempionlar Ligasyna gatnaşar (Toliç 33, 82, Barsegýan 86 – Simsir 41, Džu 50). Bratislawalylar “Koşise”, “Petražalka” hem-de “Žilina” toparlaryndan soň Slowakiýanyň adyndan Çempionlar Ligasyna wekilçilik etjek 4-nji klub bolar. Umumylykda bolsa belli hünärmen Wladimir Waýssyň tälimçiligindäki “Slowan Bratislawa” topary Çempionlar Ligasynyň final tapgyryna gatnaşýan 154-nji klub hökmünde hasaba alyndy.
Öz meýdançasynda 3-0 hasabynda ýeňiş gazanan “Dinamo Zagreb” myhmançylykda-da Azerbaýjanyň “Garabag” toparyny ýeňdi. 2-0 hasabynda üstün çykan horwatlaryň gollaryny Pýasa (32) hem-de Silwa (53 ö.d.) geçirdi. “Dinamo Zagreb” 1 ýyllyk arakesmeden soň, 9-njy gezek bu ýaryşa gatnaşar.
Öz meýdançasynda 2-1 hasabynda ýeňiş gazanan Norwegiýanyň “Bude-Glimt” topary myhmançylykda Serbiýanyň “Srwena Zwezda” toparyndan 2-0 hasabynda utulyp, agza-burna gelen Çempionlar Ligasynyň final tapgyrynyň bosagasyndan yzyna gaýtdy. Yzly-yzyna 2-nji, umumylykda 4-nji gezek gatnaşmaga hukuk gazanan serb toparynyň gollaryny Duarte (26 p) bilen Spaýiç (59) geçirdi.
