Baý nebit-gaz ýataklaryna eýe bolan Norwegiýada elektroulaglar üçin uly ýeňillikler berilýär. Şol sebäpli bu ýurt dünýäde ilat sanyna görä iň köp elektroulag satylýan ýurdy hasaplanýar. Ýurtda bu ugurda täze sepgide ýetildi. Norwegiýanyň ýol federasiýasynyň (OFV) maglumatyna görä, ýurtdaky 2,8 million hususy awtoulagyň 754 müň 303-i dolulygyna elektrik energiýasy, 753 müň 905-i benzin ýangyjy bilen işleýär. Şeýlelikde, ýurduň taryhynda ilkinji gezek elektrik energiýasy bilen işleýän ulaglaryň sany benzin bilen işleýänlerden öňe geçipdir. Maglumatlara görä dizel ýangyçly ulaglaryň sany hem azalmagyny dowam etdirýär.
OFV-miň müdiri Oýwind Solberg Torsen bu ýagdaýyň taryhy wakadygyna ünsi çekip, Norwegiýanyň elektroulaglaryň agdyklyk edýän ilkinji ýurdy bolmak üçin ynamly öňe barýandygyny beledi. Onuň sözlerine görä, häzirki wagtda dizel ýangyçly ulaglaryň sany hem az däl. Ýurtda 1 million töweregi dizel ýangyçly ulag bolup, häzirki ösüşiň dowam eden ýagdaýynda 2026-njy ýylda olaryň sany elektroulaglaryňkydan az bolar.
Maglumatlara görä, hususy ulaglaryň sany hem artyşyny dowam etdirer. Häzirki wagtda 2,8 million bolan hususy ulaglaryň sany 2030-njy ýylda 3,1 milliona ýeter.
