Angliýanyň “Mançester Siti” topary öz meýdançasynda Praganyň “Sparta” toparynyň derwezesinden jogapsyz 5 gol geçirdi. Şäherlileriň gollarynyň 2-sini öz adyna ýazdyran Erling Holannyň UÇL-däki gollarynyň sany 42 oýunda 44-e ýetdi. Şeýlelikde, “Mançester Siti” esasy wagty hasaba alanyňda UEFA Çempionlar Ligasynda 26 oýundan bäri ýeňilmän gelýär we bu ugurda şäherdeş topary “Mançester Ýunaýtediň” 25 oýunlyk rekordyny täzeledi (2007-nji ýylyň sentýabry – 2009-njy ýylyň maýy).
Başga bir iňlis kluby “Liwerpul” myhmançylykda Germaniýanyň “Leipsig” toparyny Darwin Nunýesiň ýeke-täk goly esasynda ýeňip, 3-nji duşuşygynda-da ýeňiş gazanmagy başardy. “Liwerpul” Arno Slotuň tälimçiliginde 12-nji duşuşygynda 11-nji ýeňşini gazandy.
Iň kiçi hasap bilen tamamlanan başga bir duşuşykda “Inter” myhmançylykda “Ýang Boýz” toparyny Markus Turamyň goly esasynda utdy.
Geçen tapgyrda Atletikonyň” derwezesinden jogapsyz 4 gol geçiren “Benfika” öz meýdançasynda “Feýenoorddan” 3-1 hasabynda asgyn geldi. Rotterdamlylaryň gollaryny Ueda bilen Milambo geçirdi. Portugal adyndanam ýeke-täk goly Kerem Aktürkoglu tapawutlanyp, ol bu ýaryşda bassyr 3 duşuşykdan bäri gol geçirip gelýär.
