Her ýyl geçirilýän uly 6 marafon ýaryşynyň biri bolan Nýu Ýork marafony 53-nji gezek guraldy. 165 müň ylgaýjynyň gatnaşan marafonynda erkekleriň arasynda Niderlandlardan Abdi Nageeýe ýeňiş gazandy. Asly Somaliden bolan Nageeýe ýaryşy 2 sagat 7 minut 39 sekunt tamamlamagy başardy. Ýaryşda 2-3-nji ýerleri keniýaly türgenler paýlaşdy. 2022-nji ýylyň çempiony Ewans Çebet ýeňijiden 6 sekunt, 2021-nji ýylyň çempiony Albert Korir bolsa 21 sekunt yza galdy. Geçen ýylyň çempiony, efiopiýaly Tamirat Tola 4-nji, 2019-njy ýylyň çempiony, keniýaly Jeoffri Kamworor 5-nji ýer bilen oňňut etmeli boldy.
Zenanlaryň arasynda soňky 12 ýylda 10-njy gezek keniýalylar ýeňiş gazandy. 42,195 kilometr aralygy 2 sagat 24 minut 35 sekuntda geçmegi başaran keniýaly Şeila Çepkiu 1-nji orna mynasyp boldy. Geçen ýylyň ýeňijisi, keniýaly Hellen Obiri 14 sekuntlyk aratapawut bilen bu gezek 2-nji ýeri eýeledi. Başga bir keniýaly marafonçy Wiwian Çeruiýot 2 sagat 25 minut 21 sekuntda ýaryşy tamamlap, münberiň 3-nji basgançagyna çykdy.
