Anzan Mega Mental arifmetika maksatnamasy boýunça okaýan mekdep okuwçylary Dubaý şäherinde geçirilen «MEMORIAD – 2024 Bütindünýä zehin sportlary olimpiadasyna» ýurdumyzyň adyndan ilkinji gezek gatnaşyp ýokary netije görkezdiler.
Aýratyn zehiniňi synaýan bu bäsleşige ýurdumyzyň ýaşlary bilen bir hatarda Beýik Britaniýa, ABŞ, Germaniýa, Türkiýe, Ispaniýa, Saud Arabystany, Niderlandlar, BAE, Ukraina, Katar, Mongoliýa, Meksika, Liwiýa, Koreýa, Ýaponiýa, Hindistan, Braziliýa, Alžir, Kolumbiýa, Bolgariýa, Kuba, Singapur ýaly döwletleriň 150-den gowrak iň zehinli ýaşlary gatnaşdy.
Türkmenistandan çagyrylan dalaşgärler zehin senenamasy, flaş anzan marafony, ýatdan goşmak, ýatdan köpeltmek (8×8), ýatdan kwadrat kök almak (6 belgili) atly kategoriýalardan gatnaşdylar.
Ýurdumyzyň adyndan gatnaşan Mekan Nurgeldiýew, Aýgül Ýusupowa we Ogulmaral Altyýewa medally orunlary gazandylar.
Türkmenabat şäheriniň ýöriteleşdirilen 41-nji orta mekdebiniň 5-nji synp okuwçysy Mekan Nurgeldiýew Türkmenabat Kämil Bilim Okuw merkezinde Anzan mega mental arifmetika maksatnamasy esasynda dünýä çempiýonatyna taýýarlandy. Ol Flaş Anzan Marafony kategoriýasynda 13 ýaşdan kiçi çagalaryň arasynda 1825,13 sekundyň dowamynda 43988,89 bal alyp, dünýäniň çempiony bolup, altyn medala mynasyp boldy.
Türkmenabat şäheriniň daşary ýurt diline ýöriteleşdirilen 29-njy orta mekdebiniň 5-nji synp okuwçysy Aýgül Ýusupowa Türkmenabat Kämil Bilim Okuw merkezinde Anzan mega mental arifmetika maksatnamasy esasynda dünýä çempionatyna taýýarlandy. Ol Flaş Anzan Marafony kategoriýasynda 13 ýaşdan kiçi çagalaryň arasynda 1808,7 sekundyň dowamynda 38879,11 bal gazanyp dünýäde 2-nji orna – kümüş medala mynasyp boldy.
Aşgabat şäheriniň 2-nji orta mekdebiniň 8-nji synp okuwçysy Ogulmaral Altyýewa ýatdan kwadrat kök almak (6 belgili) kategoriýasynda 13 ýaşdan kiçi çagalaryň arasynda 508,54 sekundyň dowamynda 330 bal gazanyp 3-nji orna – bürünç medala mynasyp boldy.
Şeýle hem Türkmen milli topary Bütindünýä olimpiadasyna ilkinji gezek gatnaşýandygyna garamazdan, iň işjeň gatnaşyp, tapawutlanan topar diýlip emin agzalary tarapyndan Hormat nyşany bilen sylaglandy.
Şeýle hem Memoriad Bütindünýä zehin sportlary federasiýasynyň Türkmenistandaky resmi wekili, olimpiadanyň emin agzasy, Türkmen milli toparyny ýokary dereje taýýarlandygy üçin, şeýle hem olimpiada işjeň gatnaşandyklary üçin Döwletmyrat Durdymämmedow MEMORIAD Bütindünýä zehin sportlary federasiýasy tarapyndan Hormat nyşany bilen sylaglandy.
