UEFA Çempionlar Ligasynyň liga görnüşdäki ilkinji möwsüminde duşuşyklaryň deň ýarysy tamamlandy. Sanawa seredenimizde, 4 oýnuň netijesinde garaşylyşyndan üýtgeşigräk klublary görmek bolýar. Sanawyň başyny ýeke utuk hem ýitirmedik “Liwerpul” çekýän hem bolsa, 2-3-4-nji ýerlerde degişlilikde, “Sporting”, “Monako” hem-de “Brest toparlarynyň boljakdygyndan ýaryş başlamazdan ozal, hiç kim güman etmedik bolsa gerek. Esasanam “Brestiň bolmagy hemmeleri haýran galdyrmagyny dowam edýär. 4 duşuşykda ýeňilmän 10 utuk toplan “Brest” topary taryhynda ilkinji gezek UEFA-nyň ýaryşlaryna wekilçilik edýär.
Aslynda Fransiýanyň çempionaty diýlende, irki ýyllarda “Reýms”, “Sent-Etien”, “Bordo”, “Marsel”, 2000-nji ýyllaryň başlarynda “Lion”, soňky 10-15 ýyllykda bolsa PSŽ, “Monako”, wagtal-wagtal “Lill” klublary ýadyňa düşýär. Ýöne hiç hiç haçan welin “Brest” topary ýada düşenokdy. Sebäbi “Brest” toparynyň bardygyndan hem köpler bihabar diýsek, öte geçdigimiz bolmaz. Ýurduň demirgazyk-günbatarynda ýerleşýän Brittani sebitiniň Brest şäheriniň adybir kluby bolan bu topar 1903-nji ýylda “Armoricaine de Brest” ady bilen esaslandyrylýar. 1950-nji ýylda şäherdäki 5 katolik klubuň birleşmeginden soň ady “Stade Brest” bolýar. 1958-nji ýylda professional kluba öwrülen “Brest” topary Fransiýanyň 2-nji ligasynda çykyş edip başlaýar. 1979-njy ýylda bolsa ilkinji gezek ýokary liga – “Ligue 1”-e çykýar. 1980-nji ýyllarda arasynda 2-nji liga düşse-de, 5-6 möwsüm ýokary liga wekilçilik edýär. Belli döwürlerde Dewid Žinola, Stefan Giwarş, Bernar Lama, Pol Le Guen, Frank Riberi, Serhio Goýkoçea ýaly ýyldyz futbolçylaryň çykyş eden “Brest” topary 1990-njy ýyllaryň ahyrylarynda 4-nji ligada, 2000-nji ýyllaryň başlarynda bolsa 3-nji ligada oýnaýardy. 2004-nji ýylda “Ligue 2”-de çykyş edip başlaýar we 6 möwsümden soň, 2010-njy ýylda ýokary liga “Ligue 1”-e beýgelýär. 3-nji möwsümi tamamlap, täzeden aşaky liga düşen “Brest” topary 5 möwsümden soň, ýene-de “Ligue 1”-e gaýdyp gelýär. Topar şondan bäri-de ýokary ligada saklanmagyny dowam edýär.
Şu wagta çenli ýokary ligada 18 möwsüm çykyş eden klubuň geçen möwsüme çenli “Ligue 1”-de gazanan iň ýokary netijesi 1986/87 möwsümindäki 8-nji ýer bolupdy. 2019/20 möwsümden bäri degişlilikde, 14-nji, 17-nji, 11-nji we 14-nji orunlary eýelän klub üçin geçen möwsüm ýatdan çykmajak ýyllaryň biri bolýar. Taryhy möwsümi başdan geçiren klubuň bu başarnygynda tälimçi Erik Roýuň paýy diýseň uludyr. 2023-nji ýylyň ýanwarynda Erik Roý toparyň tälimçiligine bellenilýär. Onuň esasy işi kluby ligada alyp galmak diýlip kesgitlenilýär. Roý wezipä bellenende, klub 17-nji tapgyrdan soň 13 utuk bilen aşaky orunlarda barýardy. Möwsümiň ahyrynda-da 44 utuk toplap, aşaky liga gitjek klublardan 2 basgançak ýokarda çempionaty tamamlaýar. 2023/24 möwsüminde-de Erik Roýdan talap edilen zat kluby “Ligue 1”-de alyp galmakdy. Doly ady “Stade Brestois 29” bolan klubuň düzümindäki oýunçylar beýleki toparlardan az-owlak tapawut edýär. Topardaky ýaşy birçene baran futbolçylaryň sany köpräk bolup, az sanly ýaşlar bilen olaryň arasyndaky ysnyşykly oýny artdyryp, olardan ýokary netije almakdyr.
Klubuň ýolbaşçy düzümi özboluşly hereket edýär. Tälimçi Erik Roý wezipä bellenilmänkä, 11 ýyldan bäri tälimçilik hem edenokdy. Aslynda Roýuň tälimçilik karýerasy hem ýok diýen ýalydy. Ol diňe 2010-njy ýylyň maýyndan 2011-nji ýylyň noýabryna çenli aralykda “Nissa” toparyna tälim beripdi. Fransiýaly hünärmnen şondan soň “Lans”, “Wotford” ýaly klublarda sport direktory wezipesinde işleýär. Erik Roýuň tälimçilige bellenmegi barada “Brest” toparynyň sport direktory Gregori Lorenzi: – Köpler biziň Erik Roýy tälimçi edip bellemegimizi geň görüpdi. Hatda tankyt edenler hem bolupdy. Belki olaryň bellikleri dogry bolup biler. Sebäbi Roý köp wagtdan bäri tälimçilik edenokdy. Ýöne biz täze bir zaty synap görmekçi bolduk. Toparymyzy aşaky liga düşmekden halas etmek üçin “Ligue 1”-iň 9-10 klubunda işlän tälimçini wezipä bellemäge biz mejbur däldik. Meniň şeýle netijä gelmegimde içki duýgularymyň täsiri uly boldy – diýip belläp geçýär.
Erik Roý futbolçylaryň özlerine bolan ynamlarynyň ýokary bolmagyny, şol sanda meýdançada çekinmezden hereket etmeklerini isleýär. Ýetilen bu sepgitde klubuň ýolbaşçy düzüminiň hem paýy az bolmaýar. Toparyň ýolbaşçy düzüminiň iş dolandyryş ulgamy çylşyrymly bolman, klubda meseläni az sanly ynsan çözýär. Netijede, çaltlyk we işjeňlik ýüze çykýar we olam öz oňyn netijesini berýär.
2023/24 möwsümini 61 utuk bilen tamamlan klub çempionatda PSŽ we “Monakodan” soň 3-nji orny eýeleýär. Bu bolsa täze möwsümde UEFA Çempionlar Ligasyna gatnaşmak diýmegi aňladýar. Başgaça aýdylanda, klub Ýewrokuboklara çür depeden başlaýar. Konferensiýa, Ýewropa Ligalary däl-de, läheňleriň ligasy, ähli toparlaryň arzuwy bolan Çempionlar Ligasyna gatnaşýar.
Düýş ýaly tamamlanan möwsümden soň Çempionlar Ligasynyň debýutanty “Brest” beýleki klublar üçin ýeňil garşydaş hökmünde görülýär. Täze formatdaky ýaryşyň nähili netije görkezjekdigi köpleriň esasy üns merkezinde bolup, bu ulgamyň uly klublara ýa-da kiçi klublara nähili bähbit getirjekdigi gümanady. “Brest” toparynyň duşuşjak bäsdeşleriniň belli bolmagyndan soň, klubuň tälimçisi: “Çempionlar Ligasy üçin ýörite transfer etjek zadymyz ýok. Elbetde elimizden geleni gaýgyrmarys. Häzirki toparymyz bilen meýdança çykyp, güýjümizi gaýgyrman göreşeris – diýipdi. Ýöne topar tälimçiniň aýdyşy ýaly ýörite taýýarlyk görmedik ýagdaýynda-da şowly çykyş edip gelýär. Taýýarlyk görlen bolsa, onda nähili bolardy diýen sowal köpleriň aňyna gelmän duranok.
Ilkinji duşuşyk öz meýdançasynda Awstriýanyň “Şturm Gras” topary bilen bolýar. Manetti we Abdallah Simanyň gollary bilen 2-1 hasabynda gazanylan ýeňiş “Brest” topary üçin taryhy waka hökmünde bellige alynýar. “Brest” topary 2-nji duşuşygyny-da Awstriýanyň başga bir topary “Red Bull Salsburg” bilen geçirýär. Myhmançylykda 4-0 hasabynda ýeňiş gazanyp, 1-nji oýundaky ýeňşiň tötänlik däldigini görkezýär. Duşuşykda Sima 2 gezek tapawutlanýar. Beýleki gollary-da Kamara bilen Pereira Lage derwezä girizýär. 3-nji duşuşykda garşydaş 1-2-nji oýunlara garanyňda kynrak topar – “Baýer” bolýar. Fransiýada oýnalan bu duşuşyk Lees-Melunyň hem-de Florian Wirtsiň garşylyklaýyn geçiren gollary esasynda deňlikde tamamlanýar. 4-nji duşuşyk Pragada ýerli “Spartanyň” garşysyna geçirilýär. Bu duşuşykda ýeňiş fransuz klubunyň tarapynda bolýar. Fernandes hem-de Kairineniň awtogoly bilen 2-1 hasabynda ýeňiş gazanan “Brest” häzirki wagtda 10 utukly 4 toparyň biri bolup, “Liwerpuldyr” “Sporting” hem-de “Monakodan” soň 4-nji orunda barýar.
Çempionlar Ligasynda taryhy başarnyk görkezýän “Brest” topary milli çempionatda geçen ýyl ýeňişlerinden azda-kände daşrak ýaryşy dowam edýär. 10 tapgyry tamamlanan çempionatda 4 oýunda ýeňiş gazanan “Brestiň” 5 ýeňlişi 1 deňligi bar we 13 utuk bilen 11-nji basgançakda barýar. Elbetde, wagtal-wagtal “Brest”, “Žirona” ýaly Ýewrokuboklarda tejribesi bolmadyk klublar üçin 2 uly ýaryşy ýokary netijeler bilen dowam etdirmek kyn düşýär. Bu ýagdaý kähalatlarda uly klublar üçinem kyn ýeňil bolmaýar. Öňki ýyllarda “Malaga”, “Union Berlin”, “Hoffenhaým” ýaly käbir klublara Çempionlar Ligasyna ilkinji gezek gatnaşan ýyllarynda milli çempionat bilen bilelike iki ýaryşda-da şowlulyk gazanmak başartmandy.
“Brest” topary Çempionlar Ligasynda hem “Barselona”, hem-de “Real Madrid” bilen duşuşjak 2 toparyň biridir. Beýlekisi “Borussiýa Dortmund” klubudyr. “Brest” toparynyň Çempionlar Ligasynda galan duşuşyklary başdaky 4 oýundan agyrrak geçse gerek. “Barselona” (myhmançylykda), PSW, “Şahtýor Donesk” (myhmançylykda) hem-de “Real Madrid” toparlary bilen duşuşjak “Brestiň” mundan soňky oýunlarda gazanyp biläýjek az utugy hem olaryň ýaryşy dowam etdirmegi üçin ýeterlik bolup biler. Iň bolmanda, 24 toparyň arasyna girjekdigini welin häzirde aýtsa bolar. PSŽ-niň aşaky orunlarda barýan ýaryşynda “Brest” topary ilkinji 8 toparyň arasyna giräýse, onda bu futboldaky garaşylmadyk uly wakalaryň biri hökmünde taryha girer. Ýöne ilkinji 4 oýunda görkezen başarnygy-da klub üçin uly abraý bolup, ol toparyň taryhyna altyn harplar bilen ýazylar.
Gazetiň sport synçysy
