UEFA Milletler Ligasynda çärýek finalyň, şol sanda ligada galmak üçin ýa-da ýokary liga çykmak üçin geçiriljek pleý-off tapgyrynyň duşuşyklarynyň bijeleri belli boldy.
Kubok üçin dalaş edýän “A” Ligada 1-2-nji orny eýelänleriň çärýek final duşuşyklarynda futbol janköýerlerine biri-birinden gyzykly 4 duşuşyk garaşýar. Olaryň iň esasysy Italiýa bilen Germaniýanyň arasyndaky oýun bolar. Şol sanda soňky çempion Ispaniýanyň ýygyndysy Niderlandlar bilen bije çekişdi. Daniýa bilen Portugaliýanyň hem-de Horwatiýa bilenem Fransiýanyň arasyndaky duşuşyklar çärýek finalyň beýleki oýunlary bolar. Ýarym finalda-da Italiýa – Germaniýa duşuşygynyň ýeňijisi Daniýa – Portugaliýa duşuşygyň ýeňijisi bilen duşuşar. Niderlandlar – Ispaniýa oýnunda ýeňiş gazanan toparyň ýarym finaldaky garşydaşy-da Horwatiýa ýa-da Fransiýa bolar.
Türkiýäniň ýygyndysy “A” Ligasyna çykmak üçin şol ligada galmak isleýän Wengriýa bilen duşuşar. Edil şonuň ýaly Ukraina bilen Belgiýanyň, Awstriýa bilen Serbiýanyň hem-de Gresiýa bilen Şotlandiýanyň ýygyndylary özara duşuşarlar.
Islandiýa “B” Ligada galmak üçin Kosowony, Irlandiýa Bolgariýany, Gruziýa Ermenistany, Sloweniýa-da Slowakiýany ýeňmeli bolar.
Çärýek finalyň we beýleki pleý-off duşuşyklarynyň 1-nji oýunlary 2025-nji ýylyň 20-nji martynda, jogap duşuşyklary-da 23-nji martda oýnalar. Çärýek finalda ýeňiş gazanan 4 topar ýaryşy dowam edip, olar iýun aýynda ýarym finalda duşuşarlar. Ýarym finalda ýeňiş gazanan toparlar finalda ýaryşyň 4-nji çempiony bolmak üçin özara güýç synanyşarlar. Ýarym final we finalyň geçiriljek ýeri çärýek final duşuşyklaryndan soň belli ediler.
“C” we “D” Liganyň pleý-off duşuşyklary-da 2026-njy ýylyň martynda geçiriler.
Çärýek finalyň duşuşyklary:
Italiýa – Germaniýa
Daniýa – Portugaliýa
Niderlandlar – Ispaniýa
Horwatiýa – Fransiýa
A – B Ligasy pleý-off duşuşyklary:
Türkiýe – Wengriýa
Ukraina – Belgiýa
Awstriýa – Serbiýa
Gresiýa – Şotlandiýa
B – C Ligasy pleý-off duşuşyklary:
Kosowo – Islandiýa
Bolgariýa – Irlandiýa
Ermenistan – Gruziýa
Slowakiýa – Sloweniýa
C – D Ligi pleý-off duşuşyklary:
Gibraltar – Latwiýa
Malta – Lýuksemburg
