PDF
Soňky ýyllarda abraýy artýan “Globe Soccer Awards” baýraklarynyň bu ýylky ýeňijileri belli boldy. BAE-niň Dubaý şäherinde geçirilen dabara futbolyň häzirki hem-de öňki meşhur ýyldyzlary, klublaryň ýolbaşçylary we beýleki adamlar gatnaşdylar.
15-nji gezek geçirilýän dabarada ýylyň iň gowy erkek futbolçysy diýlip, “Real Madridiň” braziliýaly ýyldyzy Winisius Junior saýlandy. Ýyldyz oýunçy ýylyň iň gowy hüjümçisi baýragyna-da laýyk görüldi. “Real Madrid” klubunyň tälimçisi Karlo Ançelotti ýylyň iň gowy tälimçisi baýragynyň eýesi boldy. Ispan klubunyň başga bir ýyldyzy Jud Bellingam hem dabaradan 2 baýrak bilen dolandy. Angliýaly oýunçy iň gowy ýarymgoragçy hem-de Maradona baýragy bilen sylaglandy. Iň gowy klub saýlanan “Real Madridiň” prezidenti Florentino Peres hem-de italiýaly meşhur ýyldyz, ozalky futbolçy Alessandro Del Piero başarnykly karýeralary üçin “Special Career Award” baýragyna laýyk görüldi.
Portugaliýaly super ýyldyz Kristiano Ronaldo bu gezegem goşa baýrak gazandy. 6 gezek ýylyň futbolçysy saýlanan 39 ýaşyndaky oýunçy Ýakyn Gündogaryň iň gowy futbolçysy hem-de ähli döwürleriň iň köp gol geçiren futbolçysy baýraklaryna mynasyp boldy. “Al Hilal” toparynyň portugaliýaly tälimçisi Žorže Žeşuş Ýakyn Gündogaryň iň gowy tälimçisi baýragy bilen sylaglandy. BAE-niň kluby, AFK Çempionlar Ligasynyň ýeňijisi “Al Ain” Ýakyn Gündogaryň iň gowy kluby diýlip saýlandy.
“Barselonanyň” ýaş ýyldyzy Lamin Ýamal bolsa iň gowy ýaş futbolçy baýragynyň eýesi boldy.
Zenanlaryň arasynda iň “Barselonanyň” ýyldyzy Aitana Bonmati soňky 2 ýylda gazanan baýraklarynyň hataryna ýene birini goşmagy başardy. Ol zenanlaryň arasynda iň gowy futbolçy diýlip ykrar edildi. Onuň çykyş edýän kluby “Barselona” bolsa ýylyň iň gowy topary hökmünde saýlandy.
Şeýle-de, “Olimpiakos” topary ýylyň ruhlandyryjy topary baýragynyň eýesi boldy. “Inter” toparynyň ýolbaşçylaryndan Piero Ausilio ýylyň sport direktory, portugaliýaly meşhur Žorže Mendeş 12-nji gezek ýylyň menejeri baýragyna laýyk görüldi. “Real Madridiň” belgiýaly derwezeçisi Tibo Kurtua, “Al Hilalyň” braziliýaly ýyldyzy Neýmar Junior hem-de angliýaly ozalky futbolçy Rio Ferdinand “Player Career Award” baýragy bilen sylaglandy.
