“Airbus” kompaniýasy öz uçarlarynyň ätiýaçlyk şaýlaryny we iri böleklerini daşamak üçin niýetläp öndüren “Beluga” ýük uçarynyň has uly görnüşini synagdan geçirdi. “Beluga XL” (“Airbus A330-700L”) model uçaryň ilkinji synagy şowly tamamlandy. Bu uçardan bäşisi öndüriler. Ol 4 sagat 11 minut uçandan soňra, Fransiýanyň Tuluza-Blanýak aeroportuna gondy. Kompaniýanyň hünärmenleri uçaryň öňümizdäki 10 aýyň dowamynda jemi 600 sagat uçjakdygyny we 2019-njy ýylda işläp başlajakdygyny belleýärler. Onuň daşky görnüşi üýtgeşikligi bilen tapawutlanýar. Daşky görnüşi kite meňzeş bolup, onuň “gözleri” we “ýylgyrýan ýüzi” hem şekillendirilipdir. Gülýän kitiň şekili “Airbus”-yň 20 müň işgäriniň arasynda geçirilen pikir soraşmanyň netijesinde saýlanypdyr. Häzirki wagtda ulanylýan A330-200 “Beluga” modeliniň bazasynda döredilen uçara Arktikanyň töwereginde ýaşaýan kitiň bir görnüşiniň ady dakylypdyr. Bu uçarlar “Airbus” uçarlarynyň Ýewropanyň dürli ýerlerinde öndürilen böleklerini Tuluza, Hamburg ýa-da Tianszindäki uçar ýygnaýjy zawodlara daşamakda peýdalanylar.
Ilkinji “Beluga” uçarlary 1994-nji ýylda ulanylyp başlanýar. 2014-nji ýylda täze ýük uçaryny öndürmek üçin işe girişilýär. “Airbus Transport International” kompaniýasynyň ýolbaşçysy Stefan Gosselin önümçiligiň artmagy bilen täze “Beluga” zerurlyk duýlandygyny belleýär. Häzirki “Belugalar” A340 uçarynyň ganatlaryny ýa-da “A350”-niň gabarasyny göterip bilýär. Emma “A380”-niň käbir bölegini daşamak üçin ýeterlik däl. “Beluga XL” häzirkilerden 6 metr uzyn we 1 metr giň bolup, göwrümi 30 % köpdür. Ýük göterijiligi bolsa, 6 tonna köp.
Ýeri gelende aýtsak, ilkinji uçuşyny 1988-nji ýylyň ahyrynda amala aşyran we bary-ýogy biri öndürilen “Antonov An-225 Mriya” dünýäniň iň uly ýük uçary bolmagynda galýar. Şeýle hem “Boeing 747 Dreamlifter”, “Antonov An-124” ýaly iri uçarlar uly ýükleri daşamakda giňden peýdalanylýar.
