PDF
UEFA-nyň 2-nji derejeli klub ýaryşy Ýewropa Ligasynda 2025/26 möwsüminiň çempiony belli boldy. Türkiýäniň Stambul şäherindäki “Beşiktaş” stadionynda oýnalan finalda Angliýanyň “Aston Willa” topary bilen Germaniýanyň “Fraýburg” topary duşuşdy. Fransiýaly Fransua Leteksieniň eminlik eden oýnuna 37 müň 324 janköýer gatnaşdy.
Çekeleşikli geçen oýunda “Aston Willa” topary 3-0 hasabynda ýeňiş gazandy. Duşuşyga iňlisler şowly hüjümler bilen başlasa-da, nemes kluby oýnuň deňagramlylygy sazlamagy başardy. Ýöne 1-nji ýarymyň ahyrlarynda geçirilen gollar “fraýburglylaryň” hüjümlerini gowşatdy. Oýnuň 41-nji minutynda Ýuri Tilemansyň goly bilen hasaby açan “Aston Willa” toparynda 45+3-nji minutda Emiliano Buendia jerime meýdançasynyň daşyndan owadan urgy bilen aratapawudy 2-0-a ýetirdi.
2-nji ýaryma “Fraýburg” topary başlarda gol geçirmek umydy bilen meýdança çykdy. Ýöne 58-nji minutda Buendianyň asist etmeginde Morgan Rojersiň goly olaryň umytlaryny puja çykardy. Duşuşygyň galan minutlarynda hasap üýtgemedi we “Aston Willa” 3-0 hasabynda ýeňiş gazanyp, taryhynda ilkinji gezek Ýewropa Ligasynyň çempionlygyny gazandy. Duşuşykda 1 gol geçirip, 1 goluň pasyny beren Argentinaly Emiliano Buendia oýnuň iň ökde oýunçysy diýlip saýlandy.
Bu Birmingem şäheriniň wekiliniň UEFA-nyň ýaryşlarynda 44 ýyldan soň gazanan ilkinji, umumylykda-da 3-nji kubogy boldy. “Aston Willa” topary 1982-nji ýylda häzirki Çempionlar Ligasynda (şol wagtky ady Ýewropanyň Çempion Klublarynyň Kubogy ýaryşy) ýeňiş gazanypdy. Rotterdamdaky finalda “Aston Willa” topary Germaniýanyň başga bir kluby “Bawariýany” Piter Witeniň goly bilen 1-0 hasabynda ýeňipdi. Şol ýylyň tomsunda-da UEFA Super Kubogynda “Barselonadan” 2 oýnuň netijesi boýunça üstün çykypdy. Barselonada 1-0 hasabynda utulan “Aston Willa” öz meýdançasynda garşydaşynyň derwezesinden jogapsyz 3 gol geçiripdi.
5-nji kubogyny gazandy
“Aston Willa” toparynyň tälimçisi, Ýewropa Ligasyny gazanmagyň ussady hasaplanýan ispaniýaly Unaý Emeri bu ada doly laýykdygyny ýene bir ýola subut etdi. 5-nji Ýewropa Ligasy Kubogyny gazanan Unaý Emeri italiýaly Karlo Ançelottiden soň UEFA-nyň ýaryşlarynda 5 kubok gazanan 2-nji tälimçi boldy.
Unaý Emeri mundan öň “Sewilýa” bilen yzly-yzyna 2014-nji, 2015-nji hem-de 2016-njy ýyllarda 3 gezek Ýewropa Ligasynyň çempionlygyny gazanypdy. Şeýle-de, 2021-nji ýylda “Wilýarreal” bilenem şol başarnygyny gaýtalypdy. 2019-njy ýylda “Arsenal” bilen finala çyksa-da, kubogy gazanyp bilmändi. Unaý Emeriniň Ýewropa Ligasyny gazanan klublarynyň 3-siniň hem adynyň asyl nusgasynda “Villa”-nyň (“Sevilla”, “Villarreal”, “Aston Villa”) bolmagy özboluşly statistikany emele getirýär. Emeri bu kubogy 3 dürli topar bilen gazanan ilkinji hünärmen diýlip bellenildi.
***
“Aston Willa” Ýewropa Ligasynda çempionlyk gazanan 6-njy iňlis topary, umumylykda 31-nji klub boldy. Soňky 6 ýylda “Wilýarreal” hem-de “Atalantadan” soň 3-nji täze çempion topar diýlip bellige alyndy.
“Aston Willanyň” angliýaly ýarymgoragçysy Jeýdon Sanço bassyr 3 möwsüm UEFA-nyň ýaryşlarynda finalda oýnap, olaryň soňky 2-sinde kubogy gazanmagy başardy. Final oýnunda 81-nji minutda meýdança giren Sanço geçen möwsüm “Çelsi” bilen Konferensiýa Ligasynda ýeňiji bolupdy.
“Aston Willanyň” hüjümçisi Temmi Abraham UEFA-nyň häzirki wagtda guraýan 3 klub ýaryşynda-da çempionlyk gazanan 2-nji futbolçy boldy. Abraham 2021-nji ýylda “Çelsi” bilen Çempionlar Ligasynda, 2022-nji ýylda “Roma” bilen Konferensiýa Ligasynda, bu ýylam “Aston Willa” bilenem Ýewropa Ligasynda ýeňiş gazandy. Abrahamdan öň italiýaly Emerson Palmieri “Çelsi” bilen ilki Ýewropa Ligasynda (2019), soňra Çempionlar Ligasynda (2021), “West Ham” bilenem Konferensiýa Ligasynda (2023) ýeňiji bolupdy.
Iňlis klublary UEFA-nyň bu ýaryşynda 11-nji gezek çempionlyk gazanyp, 10 kubokly italýanlardan öňe saýlandy. Bu ugurda ispanlar 14 çempionlyk bilen sanawyň başyny çekip gelýär. 7 gezek çempion bolan nemes klublary 10-njy sapar finalda ýeňlişe sezewar boldy.
UEFA Ýewropa Ligasynyň finaly – 20.05.2026
FRAÝBURG – ASTON WILLA: 0-3
FRAÝBURG: Atubolu – Kübler (Makengo 73), Ginter, Lienhart (Rosenfelder 61), Treu – Eggeştein, Höfler (Höler 61) – Beste (Günter 86), Manzambi, Grifo (Şerhant 73) – Matanowiç; Tälimçi: Ýulian Şuster
ASTON WILLA: Martines – Käş, Konsa, Pau Torres (Mings 88), Luka Din (Maatsen 81) – Lindelöf (Onana 66), Tilemans (Duglas Luis 88) – MakGinn, Rojers, Buendia (Sanço 81) – Watkins; Tälimçi: Unaý Emeri
GOLLAR: Ýuri Tilemans 41, Emiliano Buendia 45+3, Morgan Rojers 58
STADION: “Beşiktaş” – Stambul, Türkiýe
EMIN: Fransua Leteksi (Fransiýa)
TOMAŞAÇY: 37 324
