Tanzaniýa Afrikanyň iň täsin tebigatly ýurtlarynyň biridir. Afrika Uly Köller sebitindäki bu ýurtda ululy-kiçili birnäçe derýa, köl we şaglawuk bar. Ýurduň demirgazygyndaky Natron köli täsin häsiýeti bilen tapawutlanýar. Ol Afrikanyň iň rahatlandyryjy tebigy ýerleriniň biri hasaplanýar. Bu ýerde gyzylinjikleriň müňlerçesi ýaşaýar we köpelýär. Emma kölüň adaty bolmadyk tarapy bar. Onuň suwunyň wodorod görkezijisi (lat: pH – pondus Hydrogenii) örän ýokary – 10,5. Munuň sebäbi töweregindäki daglardan akýan çeşmeleriň suwunyň düzüminde kömürturşuly natriniň we beýleki mineral maddalaryň köp bolmagy bilen bagly. Suwuň bu häsiýeti käbir ölen jandarlaryň we guran ösümlikleriň uzak wagtlap çüýremän saklanmagyna mümkinçilik berýär. Suwunyň şeýle häsiýetiniň bardygyna garamazdan, bu ýerde baý ekosistema bar. Şor we süýji suwly batgalyklarda guşuň birnäçe görnüşi bilen bir hatarda, suwotular ösýär. Suwotular guşlaryň esasy iýmit çeşmesi bolup hyzmat edýär. Täsin tebigy künjek syýahatçylaryň we tebigaty surata alýan suratkeşleriň iň köp barýan ýerleriniň biridir.
Suwuň çekilen ýerlerinde gurap galan ösümlikleriň daşyny gaplan hek gatlagy örän täsin görnüşi emele getirýär. Ol organik galyndylary bakteriýalardan goraýar. Nik Brandt atly suratçynyň kölüň täsin gözelliklerini 2013-nji “Across the Ravaged Land” atly kitabynda çap etdiripdir.
Tanzaniýada we goňşy ýurtlardaky ýalpak köllerde we onuň adalarynda 2 milliondan gowrak kiçi gyzylinjik (Phoenicopterus minor) ýaşaýar. Natron köli Gündogar Afrikadaky iki aşgarly kölden biridir (beýlekisi Bahi). Olaryň ikisiniň hem suwy başga ýere akmaýar. Olary akar suwlar bilen bir hatarda, ýerasty ýyly suwly çeşmeler doldurýar. Bu kölleriň suwunyň ýylylygy ýylyň yssy möwsüminde 41 derejä çenli çykýar. Bu bolsa, suwy bugardyp, onuň düzümindäki duz mukdaryny artdyrýar.
