Ýewropa Merkezi bankynyň (ÝMB) başlygy Kristin Lagard Ýewropanyň ozalky sanly öwrülişikde gazanylan üstünliklerden heniz doly peýdalanyp bilmändigini, ýöne täze emeli aň döwründe öňdebaryjy orunlary eýelemäge ähli mümkinçiliginiň bardygyny belledi. Şunuň bilen baglylykda, Ýewropa Komissiýasy Italiýanyň ozalky Premýer-ministri Mário Draginiň ykdysady bäsdeşlik ugrundaky maslahatlaryna esaslanyp, emeli aň tehnologiýalaryny strategik pudaklarda ornaşdyrmak we täze nesil tehnologiýalary ösdürmek boýunça iri maglumat merkezlerini maliýeleşdirmek üçin birnäçe başlangyçlary öňe sürdi.

Kristin Lagard pul serişdelerine elýeterliligiň çäkli bolmagy sebäpli Ýewropanyň emeli aň ulgamyna az maýa goýýandygyna, kärhanalaryň esasan bank karzlaryna garaşly galýandygyna we ýerli maýa bazarlarynyň entek gowşak ösendigine üns çekdi. Kanunçylyk kadalarynyň birmeňzeş däldiginiň çykdajylara we serhetüsti hyzmatdaşlyga päsgel berýändigini bellän Lagard, Ýewropadaky kärhanalaryň ABŞ-daky bäsdeşlerine garanynda, has köp böwetler bilen ýüzbe-ýüz bolýandygyny we netijede maýa serişdeleri üçin ABŞ bazarlaryna ýüzlenmeli bolýandygyny nygtady.

Şeýle hem ol Ýewropanyň täze tehnologiýalardan doly peýdalanmaga ukyplydygyny belledi. Ýewropa dünýä ilatynyň bary-ýogy 6 göterimini emele getirse-de, bütin dünýädäki ylmy barlag geçirijileriň 15 göterimi şu sebitde jemlenendir we ähli ylmy neşirleriň bäşden bir bölegi şolar tarapyndan taýýarlanýar.

Ýewropa sebitindäki kärhanalaryň öz maýa goýumlarynyň, takmynan, 9 göterimini emeli aňa gönükdirmäge garaşýandygyny bellän ÝMB-niň ýolbaşçysy, esasy maksadyň bu mümkinçilikleri ykdysadyýete giňden ýaýradyp, hakyky ykdysady we bäsdeşlige ukyply netijelere öwürmekden ybaratdygyny nygtady. Şonuň üçin Brýusselde ara alnyp maslahatlaşylýan Tygşytlyklar we maýa goýum bileleşigi (SIU), şeýle hem “EU Inc.” ýaly ýeke-täk bazary birleşdirmek boýunça Ýewropa Bileleşiginiň möhüm özgertmeleri çaltlaşdyrmagyň zerurdygy bellenildi.

Gyzykly bolup bilerЕЩЕ ОТ АВТОРА