PDF
Mongoliýanyň paýtagty Ulan-Bator şäherinde BMG-niň Çölleşmäge garşy göreşmek boýunça Konwensiýasynyň Gatnaşyjylarynyň Maslahatynyň 17-nji sessiýasy (COP17) ýokary guramaçylyk bilen dowam edýär. 17-nji awgustynda dabaraly ýagdaýda öz işine başlan we 28-nji awgusta çenli dowam etjek bu giň möçberli halkara sammit «Ýerleri dikeldýäris, umydy janlandyrýarys» diýen baş şygar astynda alnyp barylýar. Dünýäde topragyň hiliniň ýitirilmegine, gurakçylyga we çölleşmä garşy göreşmek maksady bilen guralan bu ýokary derejeli duşuşyga Konwensiýa agza 197 ýurtdan 5 müňden gowrak wekiliýet, döwlet we Hökümet ýolbaşçylary, ministrler, halkara guramalaryň wekilleri, ylym dünýäsiniň hem-de telekeçilik pudagynyň abraýly wekilleri jemlendiler.
BMG tarapyndan yglan edilen Halkara öri meýdanlary we çarwa maldarçylygy ýylynyň (IYRP 2026) çäklerinde geçirilýän bu forum dünýäde ýerleri durnukly dolandyrmaga, howanyň üýtgemegine uýgunlaşmaga we suw serişdelerini goramaga uly ýardam berýär. Sammitiň dowamynda ministrler derejesindäki dialoglar, köptaraplaýyn forumlar we ylym bilen syýasatyň utgaşdyrylmagyna bagyşlanan ýörite sessiýalar guralyp, 2030-njy ýyla çenli ýer degradasiýasynyň bitarap derejesine (LDN) ýetmek boýunça ýerine ýetirilmeli işler jikme-jik ara alnyp maslahatlaşylýar.
Ýer eýeleriniň we çarwa jemgyýetleriniň bähbitlerini goramak, şeýle hem ekoulgamlary dikeltmek we täze maliýeleşdirme çeşmelerini tapmak boýunça bilelikdäki işler dowam edýär. Şunuň bilen birlikde, ýer eýeçiliginiň netijeli ulgamlaryny döretmek boýunça anyk ädimler ädilýär. Şunuň bilen birlikde, bu halkara çäräniň çäklerinde kabul edýän tarap hökmünde Mongoliýa tarapyndan «Milliard agaç» milli hereketi, «Suw – Ýer» sebit hyzmatdaşlygy we «Sähra gün tertibi» ýaly ençeme möhüm ekologik başlangyçlar öňe sürlüp, olaryň ähmiýeti dünýä jemgyýetçiligi tarapyndan giňden goldanylýar.
Ulan-Bator şäherindäki Milli seýilgähiň çäginde döredilen we ähli döwrebap talaplara jogap berýän «Gök» we «Ýaşyl» zolaklar taraplaryň netijeli gepleşikleri hem-de duşuşyklary geçirmegi üçin amatly şertleri üpjün edýär. Şeýle hem sammitiň dowamynda dünýäniň iri şäherleriniň häkimleriniň gatnaşmagynda geçiriljek ýörite forumda ýerli dolandyryş edaralarynyň hem bu işe goşant goşmagyny üpjün edýän Ulan-Bator deklarasiýasynyň kabul edilmegine garaşylýar. 28-nji awgusta çenli öz işini dowam etdirjek bu forumyň netijesinde ýer resurslaryny gorap saklamak, çölleşmegiň öňüni almak hem-de adamzadyň durnukly geljegini üpjün etmek ugrunda möhüm we taryhy kararlaryň kabul ediljekdigine uly ynam bildirilýär.
