Ýewropa Komissiýasy 2028-nji ýyl üçin «Ýewropanyň «ýaşyl» paýtagty» (European Green Capital) we «Ýaşyl ýaprak» (Green Leaf) baýraklarynyň finalçylaryny mälim etdi. Ispaniýanyň, Daniýanyň, Polşanyň, Slowakiýanyň hem-de Portugaliýanyň sekiz şäheri ekologiýany gowulandyrmak, zyňyndylary azaltmak we abadanlaşdyrmak ugurlary boýunça bäsleşýärler. Ýeňijiler Portugaliýanyň Gimaraýnş şäherinde yglan edilip, degişlilikde, 600 müň we 200 müň ýewro möçberinde maýa goýum grantlaryna eýe boldular.

Ekspertler dalaşgärleri altmyşdan gowrak görkeziji, şol sanda arassa howa, suw, biologik köpdürlilik we klimatyň özgermegine uýgunlaşmak ukyby boýunça baha berýärler. Bäsleşikde Ispaniýanyň Saragosa şäheri tebigy seýilgähleri birleşdirmek we sil suwlarynyň öňüni almak taslamasy bilen tapawutlanan bolsa, Portugaliýanyň Portu şäheri suw serişdelerini amatly dolandyrmagy bilen öňe saýlandy. Şeýle hem Ispaniýanyň Benidorm şäheri ilatynyň 92 göterimini ýaşyl zolaklar bilen üpjün etmegi başardy.

Ýewropa şäherlerinde amala aşyrylýan bu giň gerimli çäreler yssy klimata uýgunlaşmaga we ilatyň ýaşaýyş-durmuş derejesini ýokarlandyrmaga gönükdirilendir. Belläp geçmeli zat, Germaniýanyň Haýlbronn şäheri 2027-nji ýylyň «Ýaşyl paýtagty» diýlip saýlanan bolsa, Niderlandlaryň Breda şäheri çäginiň 60 göterimini ýaşyl zolaga öwürmegi başardy. Halkara ekspertler bu taslamalaryň beýleki Ýewropa şäherleri üçin nusgalyk meýdança bolup hyzmat etjekdigini bellediler.

Gyzykly bolup bilerЕЩЕ ОТ АВТОРА