Hormatly Prezidentimiziň oýlanyşykly, öňdengörüjilikli, ylmy taýdan esaslandyrylan durmuş-ykdysady syýasatynyň netijesinde, ähli ugurlarda bolşy ýaly, obasenagat pudagynda hem okgunly ösüşler gazanylýar. Hormatly Prezidentimiz Halk Maslahatynyň birinji mejlisinde obasenagat toplumyny ösdürmek üçin düşewüntsiz daýhan birleşikleriniň oba hojalyk ýerlerini alyp, has gowy işlemäge ukyply önüm öndürijilere bermegi we ýörite ýer gaznasyny döretmegi hem-de iş toparynyň çözgüdi esasynda ýerleri 99 ýyl möhlet bilen isleg bildirýänlere bermegi teklip etdi. Bölünip berlen ýerleriň 70 göteriminde pagta we bugdaý ekmek, galan 30 göteriminde bolsa, beýleki oba hojalyk ekinlerini ýetişdirmek kesgitlenildi.
Hormatly Prezidentimiziň öňe süren asylly başlangyçlaryndan ugur alnyp öňümizdäki ýyldan başlap, bugdaýyň hem-de pagtanyň täze döwlet satyn alyş bahalary giriziler. Oba we suw hojalygy ministrliginiň habar bermegine görä, 1 tonna bugdaýyň satyn alyş bahasy 2 esse, ýagny 400 manatdan 800 manada çenli ýokarlandyryldy. Pagtanyň bahasy çig malyň hil taýdan häsiýetnamalary nazara alnyp kesgitlenildi. 1 tonna nah pagtanyň satyn alyş bahasy ýygymyň başlanan gününden 15-nji oktýabra çenli 1 müň 500 manat, 15-nji oktýabrdan 15-nji noýabra çenli 1 müň 430 manat, 15-nji noýabrdan ýygymyň tamamlanýan gününe çenli 1 müň 365 manat bolar. Şeýle hem 1 tonna ýüpek pagtanyň, tohumlyk pagtanyň saýlama sortunyň satyn alyş bahasy ýygymyň başlanan gününden 15-nji oktýabra çenli 2000 manat, 15-nji oktýabrdan 15-nji noýabra çenli 1 müň 910 manat, 15-nji no-ýabrdan ýygymyň tamamlanýan gününe çenli 1 müň 820 manat bolar. Şu ýyl türkmen gallaçylary 760 müň gektara bugdaý ekdiler we galla kabul ediş bölümlerine 1 million tonnadan gowrak bugdaý hasylyny tabşyrdylar. Diýarymyzyň pagtaçylary hem şanly sepgidi eýelediler, ýurdumyz boýunça jemi 1 million 99 müň 236 tonna “ak altyn”, şol sanda Ahal welaýatynda 231 müň 542 tonna, Mary welaýatynda 335 müň 914 tonna, Lebap welaýatynda 301 müň 555 tonna, Daşoguz welaýatynda 230 müň 225 tonna hasyl taýýarlanyldy.
Türkmen telekeçileri obasenagat toplumynyň bäsleşige ukyplylygyny ýokarlandyrmaga, ilatymyzyň ekologiýa taýdan arassa azyk we ýokumly önümlere bolan isleglerini doly kanagatlandyrmaga mümkinçilik berýän täze önümçilik tehnologiýalaryny ynamly özleşdirmegi dowam etdirýärler. Häzirki wagtda Türkmenistanda etiň, ýumurtganyň, süýdüň, gök we bakja önümleriniň agramly bölegi hususy ulgamda öndürilýär. Mundan başga-da, guşçulyk toplumlarynyň gurulmagynyň hasabyna goňşy ýurtlara towuk ýumurtgalarynyň eksport edilmegi ýola goýuldy. Häzirki wagtda oba hojalygynda hususy ulgamyň paýy 92 göterimden geçýär.
“Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2020-nji ýyla çenli döwür üçin rejelenen görnüşdäki Milli maksatnamasyny” toplumlaýyn durmuşa geçirmegiň çäklerinde birnäçe döwrebap obalar guruldy we birnäçesiniň gurluşygyna badalga berildi. Olara Kaka etrabynyň “Gowşut”, Ak bugdaý etrabynyň “Öňaldy”, Gökdepe etrabynyň “Köpetdag” we “Owadandepe” geňeşlikleriniň çäginde gurulýan häzirki zaman obalaryny mysal getirmek bolar. Häzirki wagtda Ahal welaýatynyň täze dolandyryş merkezini gurmagyň konsepsiýasynyň üstünde işlenilýär. Şol taslamanyň çäklerinde-de oba adamlarynyň ähli amatlyklary bolan kaşaň binalarda ýaşamagy üçin täze ýaşaýyş jaýlarynyň uly toplumyny gurmak meýilleşdirilýär.
