“Oceanix” atly taslamanyň çäklerinde suwuň ýüzünde, batmaýan şäherleriň döredilmegi göz öňünde tutulýar. Adamlaryň ýaşamagy üçin ähli şertleriň döredilen bu taslamasyna Birleşen Milletler Guramasy hem goldaw berýär. Taslamanyň ýolbaşçysy Mark Kollins bu taslamanyň diňe nazaryýet bilen çäkli däldigini we onuň durmuşa geçirilmegini isleýändiklerini aýtdy. Bu pikiri ilkinji bolup, binagär Býarke Ingels orta atypdyr. Ilkinji nobatda, 300 adamly kiçiräk obalar dörediler. Altyburçluk görnüşli bir-birine golaý guruljak obalar bolsa, 10 müň ilatly şäheri emele getirer. Bu şäherde awtoulaglar we ýük ulaglary göz öňünde tutulmandyr. Olaryň ýerine kiçeňräk gämilerden we dronlardan peýdalanylar. Gündelik durmuşda ulanylan zatlardan emele gelen zibiller bolsa, gaýtadan işleniler. Suwuň ýüzündäki obanyň belli ýerlerinde we suwuň aşagynda dürli miwedir gök önümler ösdürilip ýetişdiriler. Ýaşamak üçin iň zerur zatlaryň biri bolan arassa suw howadan alnar. Suwuň ýüzünde bolandygy sebäpli, çygly howadan suw almak has aňsat bolar. Häzirki wagtda tehnologiýanyň ýeten derejesi howadan suw almaga mümkinçilik berýär we şeýle enjamlar köp ýerde ulanylýar. Obany emele getirýän infrastrukturanyň suwuň aşagyndan bir-birine birikdirilmegi göz öňünde tutulýar. Şeýlelikde, güýçli tolkun ýa-da ýel jaýlara täsir edip bilmez. Şäherde mekdep, kitaphana we beýleki ähli zerurlyklar göz öňünde tutulan. Şäheriň düýbi tutulanda ulanyljak materialyň betondan üç esse berk boljakdygy bellenilýär.
Ýeri gelende aýtsak, aslynda gadymy döwürlerden bäri suwuň ýüzünde ýaşaýan adamlar hem bar. Peru bilen Boliwiýanyň aralygyndaky Titikaka kölünde gamyşdan edilen adajyklarda uro atly halkyýet ýaşaýar. Urolar jaýlaryny, öý goşlaryny, hatda gaýyklaryny hem şol bir gamyşdan ýasaýarlar. Dag gerişleriniň arasyndaky bu kölde döredilen iň uly adajyk 10 hojalyga niýetlenen. Bu adajyklarda mekdep, Saglyk öýi, hatda Radio öýi hem bar.
