Ýewropa ligasynda finala çykan 2-nji topar hem belli boldy. Düsseldorf şäherinde oýnalan ýarym finalda Italiýanyň “Inter” topary Ukrainanyň “Şahtýor Donesk” klubuny uly hasap bilen, 5-0 hasabynda ýeňlişe sezewar etdi. Oýnuň 1-nji ýarymynda 1 gol geçirilip, italýanlar duşuşygyň soňky 25 minutynda 4 pökgini “Şahtýoryň” derwezesinden girizdiler. 1-nji ýarymdaky goly 19-njy minutda Lautara Martines öz adyna ýazdyrdy. 2-nji ýarymda bolsa 64-nji minutda Danilo D’Ambrosio, 74-nji minutda ýene-de Martines, 78-nji we 84-nji minutlarda-da Romelu Lukaku tapawutlandy. Lukaku ýaryň çäginde bassyr 10-njy duşuşykda-da tapawutlanyp, öz rekordyny ösdürdi. Şeýlelikde, 5-0 hasabynda ýeňşini baýram eden “Inter” topary finalda “Sewilýanyň” garşydaşy boldy. Bu ýaryşda soňky gezek 1998-nji ýylda finala çykan “Inter” 5-nji sapar Ýewropa ligasynyň finalynda çykyş eder. Ýewrokuboklarda 10 ýyldan soň, finala çykan “Interiň” şu möwsümde geçiren gollarynyň sany 111-e ýetdi. Bu bolsa klub üçin soňky 90 ýyldaky iň ýokary görkezijidir. “Sewilýa” bilen “Interiň” arasyndaky final duşuşygy anna güni, ýagny 21-nji awgustda Kölndäki “RheinEnergie” stadionynda oýnalar.
