Mundan 148 ýyl ozal, şu günlerde, has takygy, 1872-nji ýylyň 30-njy noýabrynda futbolyň taryhynda milli ýygyndylaryň arasyndaky ilkinji duşuşyk oýnalýar. FIFA tarapyndan resmi ýagdaýda milli ýygyndylaryň arasyndaky ilkinji duşuşyk diýlip ykrar edilýän bu oýunda futbolyň watany Beýik Britaniýanyň 2 wekili – Şotlandiýa bilen Angliýanyň ýygyndylary duşuşýar. Duşuşyk Şotlandiýanyň iri şäheri Glazgonyň çäginde ýerleşýän Patrik şäherçesindäki Günbatar şotland kriket klubunyň meýdançasy bolan “Hamilton Crescent”-de geçirilýär. Şotlandiýaly William Keýiň eminlik eden oýnuna 4000 janköýer tomaşa edýär. Garamtyl gök eşikde çykyş eden Şotlandiýanyň ýygyndysynyň ähli oýunçysyny şol wagtlaryň meşhur kluby “Kuins Park” toparynyň oýunçylary düzýär. Ak köýnekçede meýdança çykan iňlis oýunçylary 9 klubdan çagyrylýar. Başlamaly wagtyndan 20 minut giç başlan duşuşyk golsuz ýagdaýda tamamlanýar. Bu duşuşyk milli ýygyndylaryň arasynda iň köp özara duşuşan 2 ýygyndynyň Angliýa bilen Şotlandiýanyň arasyndaky ilkinji resmi oýun bolýar. Soňky gezek 2017-nji ýylda duşuşan 2 ýygyndy özara 114 gezek gabatlaşýarlar. Şolarda Angliýa 48, Şotlandiýa 25 gezek ýeňiş gazanýar (41 deňlik). Olaryň 115-nji duşuşygy bolsa Ýewropa çempionatynda bolar.
Aslynda 2 topar bu hasaba alnan resmi duşuşyga çenli hem 1870-1872-nji ýyllarda Londonda 5 duşuşyk geçirýär. 1870-nji ýylyň 5-nji martynda (1-1), 19-njy noýabrynda (1-0), 1871-nji ýylyň 25-nji fewralynda (1-1), 18-nji noýabrynda (2-1) hem-de 1872-nji ýylyň 24-nji fewralynda geçirilen oýunlarda iňlisler 2 gezek ýeňiş gazanýar. Ýöne Angliýanyň Federasiýasy tarapyndan guralan bu görkezme duşuşyklaryny FIFA resmi ýagdaýda hasaba almaýar.
