Ispaniýanyň “La Ligasynda” 15-nji tapgyrda “Barselona” topary myhmançylykda “Walýadolidi” 3-0 hasabynda ýeňdi. Duşuşygyň gollaryny Klemen Lengle (20), Martin Breýtwaýt (35) hem-de Lionel Messi (65) derwezä girizdi. Toparynyň 3-nji goluny geçiren Lionel Messi katalonlaryň düzümindäki 644-nji pökgüsini derwezä urup, taryhy rekord goýdy. Ol Peläniň 1 klubda iň köp geçiren oýunçy rekordyny 46 ýyldan soň täzelemegi başardy. 1957-1974-nji ýyllar aralygynda “Santosda” 656 oýunda 643 gol geçiren Pele bu ugurda rekordyň öňki eýesidi. 17 ýyldan bäri “Barselonanyň” düzüminde çykyş edip gelýän Messi 644 goly 748 duşuşykda geçirdi.
