Amerikaly telekeçi “Tesla” we “SpaceX” kompaniýalarynyň ýolbaşçysy Ilon Mask, “Amazon”-yň başlygy Jeff Bezosdan öňe geçip, dünýäniň iň baý adamy boldy. CNBC teleýaýlymynyň hünärmenleriniň bellemegine görä, “Tesla”-nyň paýnamalarynyň söwdasy ýokarlanandan soň, Ilon Maskyň baýlygy 185 milliard dollara ýetdi. Jeff Bezosyň aktiwleriniň umumy gymmaty bolsa, 184 milliard dollar bolup galýar.
“Bloomberg”-iň mundan az wagt ozalky ýaýradan sanawynda Jeff Bezos 184 milliard dollar bilen birinji ýerde, Ilon Mask bolsa, ikinji ýerde gelýärdi. Agentligiň hünärmenleri şonda onuň baýlygynyň 181 milliard dollara deňdigini çaklapdylar.
Ilon Mask geçen ýylyň noýabr aýynyň ahyrynda, “Bloomberg”-iň reýtinginde “Microsoft”-yň esaslandyryjysy Bill Geýtsden öňe geçip, ikinji ýeri eýeledi. Şol ýylyň ýanwar aýynda Ilon Mask bu sanawda diňe 35-nji ýerde orun alandygy aýratyn bellärliklidir. “Tesla”-nyň biržadaky gymmatly kagyzlarynyň bahasynyň artmagynyň hasabyna telekeçiniň baýlygy barha artýar. Mask soňky bir ýylyň içinde has hem gurplandy. Ol 2020-nji ýyly 27 milliard dollar girdejisi bilen başlap, iň baý 50 adamyň hataryna girdi.
