Italiýanyň Super Kubogy duşuşygynda çempion “Ýuwentus” bilen Kubogyň eýesi “Napoli” klublary duşuşdy. Çekeleşikli geçen oýnuň 1-nji ýarymynda tapawutlanmak iki topara-da başartmady. Ýöne 2-nji ýarymda has erjel oýun görkezen turinliler 2-0 gol geçirip, ýeňiş gazanmagyň hötdesinden geldiler. “Ýuwentusa” ýeňiş getiren gollary 64-nji minutda Kristiano Ronaldo bilen 90+5-nji minutda Alwaro Morata geçirdi. Oýnuň 80-nji minutynda “Napoliniň” hüjümçisi Lorenzo Insinýe penalti urgusyny dürs urup bilmedi. Şunlukda, “Ýuwentus” 9-njy gezek Italiýanyň Super Kubogyny eýeledi
.
Ronaldo taryhyň iň köp gol geçiren futbolçysy
Soňky 32 oýunda 32-nji goluny geçiren Ronaldo “Ýuwentusdaky” 4-nji, toparyň tälimçisi Andrea Pirlo bolsa tälimçilikdäki ilkinji kubogyny gazandy. Ronaldonyň geçiren goly onuň karýerasyndaky 760-njy resmi goly hökmünde hasaba alyndy. Şeýlelikde, portugaliýaly ýyldyz futbol taryhynyň iň köp gol geçiren oýunçysy diýlen rekordyň ýeke-täk eýesi boldy. Bu ugurda ozalky rekord çehiýaly Ýosef Biçana degişlidi (759 gol).
